Në qendër të një procesi të madh gjyqësor që po zhvillohet në Namur është shqiptari Alket.V, i konsideruar si organizatori kryesor i një rrjeti të madh kriminal që merrej me prodhimin dhe tregtimin e kanabisit në Belgjikë. Ai ishte dënuar më parë me dhjetë vite burg dhe kërkohej nga policia shqiptare, por kishte ikur në Spanjë, prej nga ku dyshohet se drejtonte plantacionet e shpërndara në dhjetë vende të Valonisë dhe Brukselit. I arrestuari kundërshton rolin e drejtuesit.
Pavarësisht mohimeve të tij, prokuroria e përshkruan si drejtuesin e padiskutueshëm të organizatës: ai rekrutonte njerëz, paguante, organizonte, shiste dhe importonte. Fitimet ishin të mëdha – vetëm një transaksion në dhjetor 2020 për 13 kilogramë kanabis vlente 59 800 euro, ndërsa klientët kryesorë blinin çdo javë deri në 50 kilogramë. Një i pandehur tjetër madje krenohej se kishte fituar 50 mijë euro për vetëm një orë.
Problemi kryesor ishte pastrimi i shumave të mëdha të parave. Sipas hetimeve, Alketi përdorte sistemin tradicional hawala, të njohur në vendet aziatike dhe arabe për transferime të shpejta dhe diskrete parash pa gjurmë bankare. Paratë kalonin fillimisht tek motra dhe kunati i tij në Shqipëri, më pas një pjesë kthehej në Belgjikë nën formën e “huave familjare”. Këto shuma shpalleshin zyrtarisht si kontribute personale ose kursime për blerjen e pasurive të paluajtshme, përmes një kompanie fasadë që në letra figuronte si firmë ndërtimi, por që nuk kishte asnjë mjet apo aktivitet real.
Në një përgjim të policisë në nëntor 2023, Alket.V dhe bashkëshortja e tij flisnin hapur për transferimin e 70 mijë eurove me këtë skemë. Zyrtarisht, e quanin hua. Jozyrtarisht, prokuroria e cilësonte para cash nga trafiku i drogës.
Në fund të seancës, prokuroria kërkoi dënim me 14 vite burg për shqiptarin, të cilin e cilëson si trurin e një rrjeti kriminal që jo vetëm tregtonte kanabis, por edhe përdorte metoda të sofistikuara për pastrimin e parave.
