Kryetari i Partisë Republikane, Fatmir Mediu, pas një takimi të enjten me ish-kryeministrin Sali Berisha, theksoi rëndësinë e implementimit të paketës McAllister, e pranuar dje nga mazhoranca dhe opozita, dhe qe finalizoi dhe arritjen e marreveshjes per zgjidhjen e krizes politike ne vend.
“Diskutova me z. Berisha për mundësinë e një marrëveshje sa më optimale, ku e rëndësishme është implementimi i paketës McAllister. Negociatat nuk i bën z. Berisha, por z. Basha. Ai ka dhe përgjegjësinë maksimale, në raport jo vetëm me PD-në dhe opozitën, e cila ka qënë tërësisht luajale në rolin që ka luajtur, por dhe në raport me interesin e qytetarëve shqiptarë, pasi çdo marrëveshje, shtoi ai, merr vlerë kur i shërben qytetarëve”.
Kreu republikan falenderoi posaçërisht ambasadorin amerikan, Donald Lu, por dhe Zv/ndihmës sekretarin amerikan Hoyt Yee për angazhimin e treguar per te bindur opoziten qe te hyje ne zgjedhje. “Të gjitha negociatat kanë synuar në një gjë: që Shqipëria të ketë zgjedhje me standarde”, deklaroi Mediu.
E ndërsa ka zëra se 25 qershori mund te jete data e mundshme e zgjedhjeve te ardhshme, kryetari i PR-së thotë se paketa McAllister që ështe pranuar parashikon 16 korrikun dhe çdo datë tjetër duhet të ketë një arsyetim të fortë logjik.
Nuk e kam idenë se kush mund të jetë data, por në paketën ‘McAllister’ që kemi pranuar, ka qenë data 16 korrik. Nëse do ketë datë tjetër atëherë duhet të ketë një arsyetim logjik pse ka datë tjetër. PD dhe PR kanë qëndrime të përbashkëta, shtoi ai.
Mediu pohoi se pas takimit me kryeministrin Edi Rama, kreu i PD-se, Lulzim Basha do te ketë një takim me aleatët, ku keta të fundit pritet të informohen për marrëveshjen e arritur dje mes palëve. /b.d
