Një gazetare e televizionit shtetëror rus është vrarë nga një minë tokësore në rajonin Belgorod pranë kufirit me Ukrainën, sipas mediave shtetërore ruse.
Pervy Kanal TV tha se korrespondentja e luftës Anna Prokofieva, 35 vjeçe, vdiq “gjatë kryerjes së detyrës së saj”, duke shtuar se kameramani i saj Dmitry Volkov u plagos rëndë.
Transmetuesi tha se mina tokësore ishte vendosur nga ushtria ukrainase, shkruan A2 CNN.
Rajoni i Belgorodit ka qenë nën sulme të shpeshta nga Ukraina, me raporte të pakonfirmuara për luftime tokësore atje.
Në fillim të kësaj jave, autoritetet ruse thanë se gjashtë persona u vranë në Ukrainën lindore të pushtuar nga Rusia, duke përfshirë tre gazetarë.
Sipas të dhënave të ofruara nga Komiteti për Mbrojtjen e Gazetarëve, pothuajse 20 punonjës të medias janë vrarë që nga pushtimi rus i Ukrainës.
