I pyetur për çështjet e rishikimit të paketës “Anti shpifje” dhe se sa ky mund të cilësohet si një ligj që mund të “mbyllë gojën e gazetarëve”, kreu i qeverisë Edi Rama, gjatë një konference me ministren e Punëve të Jashtme të Suedisë, Ann Linde, e cilësoi si të kundërtën:
“Ligji do kalojë, por jo për t’i mbyllur gojën gazetarëve, por që të gjithë që bien pre e akuzave të pabaza kanë mundësi të mbrohen”.
Rama tha se projektligji nuk do të çohet më në Komisionin e Venecias për rishikim.
Gjithashtu Rama u shpreh se tashmë paketa i ka bërë ndryshimet sipas rekomandimeve të OSBE/ODHIR.
Kryeministri shtoi se mbështetja më e madhe për këtë ligj ka ardhur nga bizneset:
“Dhe po ju them se mbështetja me e madhe erdhi nga bizneset për këtë paketë, pasi ata po shantazhohen çdo ditë nga mediat.
Në këtë xhungël dezinformimi, përmes shkeljes së etiketës, njerëzit do kenë mundësi të mbrohen në gjykatë ndaj çdo njeriu që fshihet pas anonimatit”, tha Rama.
“Për sa i përket ligjit, ligji është i konsultuar një vit me OSBE-në dhe i miratuar nga OSBE-ja ndërkohë që tani po bëhet adoptimi i Komisionit të Venecias dhe ligji do të kalojë jo për t’i mbyllur gojën gazetarëve, por për të krijuar një mjedis më etik ku të gjithë mund të flasin, por ata që janë pre e sulmeve të pabaza kanë mundësi të mbrohen.
Ne do ta miratojmë ligjin sepse në këtë xhungël disinformimi, keqedukimi, sulme ndaj personaliteteve përmes shkeljes së përditshme të etikës së medias së paku individët të kenë të drejtën të kërkojnë llogari përpara gjykatës çdokujt që i sulmon dhe fshihet pas anonimatit apo burimeve të jashtme. Në fakt u bien njerëzve si të ishin të pavlerë në shoqërinë tonë. Kjo nuk mund të vazhdojë”, tha Rama.
/e.rr
