Zhvillimet e fundit në Maqedoni, si dhe konfliktet e nisura në distancë me Kosovën kanë sjellë edhe reagimin dhe interpretimin e mediave serbe.
Sipas tyre, marrja peng e stacionit policor në Goshincë si dhe kalimi i personave të dyshimtë në kufirin Maqedoni-Kosovë, është skenar i nxitjes së Shqipërisë së Madhe.
Sipas të përditshmes serbe Blic, terroristët shqiptarë, anëtarë të UÇK, sulmuan institucionet maqedonase në dy javët e fundit në një fshat te vogël afër kufirit me Kosoven.
“Një gjë është e sigurt: tensioni mes Maqedonasve dhe shqiptareve po vjen duke u rritur”, shkruan Blic.
Duke cituar historianin Cedomir Antic, Blic shprehet se situata në perëndim të Maqedonisë mund të jetë më e keqe se kaq.
“Shqiptarët janë i vetmi komb në Ballkan që nuk arritën të bëjnë një shtet të vërtetë kombëtar si Serbia, Kroacia, Bullgaria, Greqia. Nga ana tjetër, ata kanë një mbështetje të madhe nga SHBA, Britania e Madhe dhe Gjermania, që i përkrah në çdo gjë që bënë në Kosovë dhe Maqedoni” thotë historian serb Antic.
Ndërsa duke cituar ish- shefin e agjencisë ushtarake sekrete, Blic shprehet se “Shqipëria e Madhe” është projekt ne progres, ndërkohë që komuniteti ndërkombëtar qëndron në heshtje.
Redaksia Online
(Javanews.al)
