Tifozët shqiptarë e kishin pritur prej kohësh një përballje zyrtare me Italinë dhe kjo pritje tashmë ka marrë fund. Pasi shorti për Botërorin e vitit 2018 që do të organizohet në Rusi na ka vënë pikërisht përballë të kaltërve. Por jo vetëm kaq. Shqipëria do të ketë përballë edhe Spanjën. Një grupi ferri ky për Shqipërinë, por që nga ana tjetër do u japë mundësinë sportdashësve shqiptarë të ndjekin nga afër kampionët italianë dhe spanjollë. Ndërkohë skuadrat e tjera që janë në grupin tonë, atë G, janë edhe Izraeli, Lihtenshtejni dhe Maqedonia fqinje.
Reagimet
Presidenti i FSHF-së, Armand Duka nuk është befasuar fare nga shorti i Botërorit 2016, i hedhur në Shën Peterburg, madje edhe pse në dukje si i vështirë, ai shikon si një mundësi për të treguar rritjen e kuqezinjve tanë. Në një prononcim për mediat, Duka shprehet se, tashmë nuk ka më ekipe të dobëta duke kërkuar që Shqipëria të mos ndihet inferiore përballë Italisë dhe Spanjës. “Nuk ka skuadra të dobëta, kemi në grup skuadra të mëdha, kjo është akoma më bukur. Bëhesh i madh kur mund të mëdhenjtë, shpresoj ta bëjmë këtë”, ka deklaruar presidenti i FSHF-së Duka, duke mos e fshehur dëshirën e tij për të sfiduar edhe kampionë të botës, si Italia dhe Spanja. Nga tjetër, italiani Xhani De Biazi që është tashmë edhe nënshtetas shqiptar do të ketë mundësinë të përballet me vendin e tij, ka bërë edhe një koment në faqen e tij zyrtare. “Shqipëria ime në grup me Spanjën, Italinë, Izraelin, Maqedoninë dhe Lihtenshtejnin”, ka shkruar trajneri i kuqezinjve. Ndërsa trajneri i Italisë, Antonio Konte, në reagimin e tij të parë e ka cilësuar përballjen me Spanjën si stimulues.
Ndërsa gazeta sportive më e madhe italiane, Gazzetta dello Sport, duke bërë një analizë të kundërshtarëve të Italisë, shkruan se Shqipëria nuk duhet vlerësuar. Duke nënvizuar faktin që aktualisht Shqipëria ndodhet e 36 në renditjen e FIFA-s, Gazzetta dello Sport, thekson se edhe pse nuk ka qenë asnjëherë në ndonjë Botëror, Shqipëria e viteve të fundit e ka përmirësuar shumë nivelin. Duke vlerësuar trajnerin Xhani De Biazi, prestigjiozja italiane shkruan se puna e tij po jep frute. Madje Gazzetta dello Sport e cilëson përballjen me Shqipërinë edhe si një “derbi”, sepse sipas saj në Serie A luajnë shumë lojtarë të kombëtares tonë si: Hysaj, Memushaj, Berisha, Basha, Cani, dhe Cana, që siç thekson edhe gazeta italiane është lider i skuadrës dhe rekordmen me 82 prezenca. E vetmja përballje mes Italisë dhe Shqipërisë është miqësorja e 18 nëntorit 2014, kur në Xhenova një goditje me kokë e Okakas i dha fitoren 1-0 Italisë.
