Protesta përballë ambasadës greke e organizuar nga shoqata “Çamëria”, dhe Partia Drejtësi Integrim dhe Unitet, ka alarmuar mediat fqinje të cilat i kanë kushtuar hapësirën kryesore të edicioneve informative.
Tubimi në Tiranë kundër marrëveshjes Shqipëri-Greqi, që sipas protestuesve fshin emrin “Çamëri”, është pasqyruar dhe komentuar në “Prototema” , “Tv Antena 1”, “Elefterotipia” etj.
“Protesta e çamëve u zhvillua para ambasadës greke me parullën kryesore ” “Nuk fshihet emri Çamëri, është çështje e të Drejtave të Evropës …”
Organizatorët kishin lehtësira nga ana e shtetit për të protestuar kundër qeverisë greke duke e detyruar të kërkojë falje dhe kthimin e pronave të tyre.
Ata mbanin një tabelë me fotografi të politikanëve grekë dhe nazistë, duke barazuar edhe Ministrin e Jashtëm grek Nikos Kotzias me Goebbels. Të tjerë thërrisnin se çamët janë viktima të genocidit, të tjerët thërrisnin sloganin ” Çamëria është shqipëri” dhe një nga organizatorët e demonstratës bërtiti që Çamët janë si çifutët për Hitlerin: pa shtetësi dhe pa varret e paraardhësve”, nënvizon Tv Antena 1 në edicionin qëndror të lajmeve.
Ditën e djeshme dhjetëra qytetarë me flamuj kuq e zi morën pjesë në protestë duke kërkuar transparencë për marrëveshjen që pritet të nënshkruhet mes Shqipërisë dhe Greqisë.
“Shqiptarët po mundohen me çdo mënyrë të vendosin Çamërinë në temën e bisedimeve mes dy ministriave të jashtëm të dy vendeve. Këtë herë ata u përpoqën të bëjnë diçka ndryshe, u mblodhën jashtë ambasadës greke në Tiranë për të protestuar. Ata madje i kërkuan Greqisë të kërkojë falje për gjenocidin e shkaktuar ndaj çamëve,” shkruan ProtoThema
Një nga pikat kryesore të tubimit ishte që emri ‘Çamëri’ të mos fshihet nga tekstet shkollore ashtu siç përflitet në media nga detajet e para të projekt-marrëveshjes.
