Shqipëria turistike vijon të marrë vëmendje në mediat franceze. Agjencia e njohur e dedikuar për udhëtimet, “Petit Futé”, i ka kushtuar një reportazh të gjatë, duke renditur edhe 15 destinacionet kryesore që nuk duhen lënë pa u vizituar.
Sipas saj, Shqipëria është plot me atraksione për këdo që e do historinë, trashëgiminë arkitekturore dhe natyrën. Udhëtimi i medias franceze nis nga Tirana, për të vijuar me natyrën e thyer në male e pyje, pa lënë mënjanë bregdetin dhe qendrat historike.
“Me liqene të mëdhenj, bregdet me diell, natyrë të mrekullueshme dhe komunitete me bukuri autentike, Shqipëria është një thesar pak i njohur i vendosur në zemër të Ballkanit”, shkruan agjencia franceze.
Në kryeqytet rekomandohen monumentet kryesore dhe jeta urbane. Më pas vijnë Berati dhe Gjirokastra me historinë dhe shtëpitë e tyre tradicionale. Parku Arkeologjik i Butrintit dhe ai i Apolonisë konsiderohen destinacione kryesore për t’u njohur me lashtësinë.
Riviera shqiptare nga Vlora në Sarandë ofron, sipas saj, një udhëtim vërtet të bukur. Nuk lihet mënjanë as Korça, për të vijuar në liqenin e Ohrit. Në listën e “Petit Futé” janë përfshirë gjithashtu Durrësi, Kruja, Shkodra dhe deri te Kanionet e Osumit.
