“155 muxhahedinë nga Iraku mbërrijnë sot në Shqipëri”. Kështu shkruan sot Fars News Agency, lajm që konfirmohet më pas dhe nga burime të ministrisë së Brendshme në Shqipëri qe cilësojnë se akomodimi i tyre do të bëhet në banesa private. Fars shkruan se gjatë muajit gusht do të mbërrijnë gjithsej 676 muxhahedinë nga Iraku. Ministria jonë e brendshme konfirmon se ditën e sotme kanë mbërritur 40 muxhahedinë.
Sipas të njëjtave burime në aeroportin e Rinasit mësohet se kanë mbërritur 40 persona të cilët janë pjesë e marrëveshjes për akomodimin e muxhahedinëve në Shqipëri.
“Valë të tilla ardhjesh janë periodike. Lëvizjet e tyre mbahen sekret për shkak se këta persona janë nën mbrojtje. Mësohet se ata janë akomoduar në banesa private dhe jo në qendrat shtetërore shqiptare”, bëjnë me dije burimet raporton BW.
Lajmi për strehimin e muxhahedinëve iranianë në Shqipëri u bë publik rreth 2 vite më parë. Pohimi në atë kohë u bë nga ish-kryeministri i vendit, Sali Berisha, gjatë një takimi me zëvendësndihmës Sekretaren në Departamentin e Shtetit të Shteteve të Bashkuara të Amerikës, në Zyrën e Çështjeve të Lindjes së Afërt, Barbara Leaf, së bashku me Përfaqësuesin e Posaçëm të Sekretarit të Përgjithshëm të Organizatës së Kombeve të Bashkuara për Irakun, Martin Kobler.
Muxhahedinët kanë qenë të vendosur për dekada të tërë në Irak, nën mbrojtjen dhe mbështetjen e Sadam Huseinit, por mbas rrëzimit të regjimit dhe pasi pranuan të çarmatoseshin, ata u morën nën mbrojtje nga ushtria amerikane.
Me largimin e ushtrisë amerikane nga Iraku, lindi nevoja e vendosjes së tyre në vende të treta, pasi qeveria irakene kërkoi largimin e tyre nga Iraku nga ku ishte e veshtire te mbroheshin nga sulmet e porositura.
Qeveria amerikane u përpoq për disa vite të gjente vende që mund t’i strehonin muxhahedinët por, me përjashtim të Shqipërisë, vendet e tjera refuzuan për shkak të rrezikshmërisë që ata mund të paraqesin duke patur parasysh të shkuarën e tyre terroriste./a.m.
