Sanksionet e UEFA-s ndaj Bjellorusisë, kanë krijuar përshtjellime, për sa i përket eliminatoreve të Europianit, që do të zhvillohen duke filluar nga viti i ardhshëm.
UEFA e ka konfirmuar se ndeshja e parë e Bjellorusisë kundër Zvicrës së Granit Xhakës dhe Xherdan Shaqirit në kualifikimet për Kampionatin Evropian 2024 do të zhvillohet në Novi Sad të Serbisë, më 25 mars të vitit 2023.
Ky vendim është marrë pasi Bjellorusia është nën sanksione për shkak të mbështetjes së Rusisë në luftën me Ukrainën dhe nuk mund të luajë ndeshjet e saj në shtëpi. Ndërkohë në lidhje me ndeshjen Bjellorusi – Zvicër që do të luhet në Novi Sad, gazeta e madhe kroate “Jutarnji.hr” me të drejtë ka ngritur pyetjen “a do të luajë në Serbi edhe Kosova”, pasi që është në të njëjtin grup me Bjellorusinë.
“A është e mundur? Zvicra ndeshjen e radhës do ta luajë në Serbi! Në rregull, Bjellorusia nuk mund të luajë në shtëpi. A do të luajnë edhe në Serbi me Kosovën që është në të njëjtin grup?” – ka shkruar gazeta kroate.
Bjellorusia dhe Kosova do të përballen më 19 qershor nga ora 20:45, sipas orarit të publikuar në uebfaqen e UEFA-s, mirëpo ende nuk është zbuluar vendi se ku do të zhvillohet kjo ndeshje. Gjasat janë të mëdha që të gjendet një destinacion tjetër për këtë duel, ndërkohë që ngelet për tu parë se çfarë do të ndodhë.
/e.d
