“Rregu nga Shqipëria… të miturit vijnë së bashku me prindërit ose me miqtë, por më pas qëndrojnë në Itali, nën administrimin e institucioneve lokale, pasi deklarohen se janë të vetëm”.
Ky është alarmi që ngre gazeta italiane “Il Gionarle D’Italia”, e cila shkruan se ka një mekanizëm të tërë mashtrimi për t’u futur ilegalisht në territorin italian dhe më pas, për të mbetur aty, shkruan Express.
Sipas medias, të miturit shqiptarë vijnë përmes autobusëve turistikë (SOM) dhe me të kaluar kufirin vetëshpallen si të “braktisur”. Por sipas ligjit italian të miturit e braktisur nuk trajtohen njëlloj me maxhorenët dhe përfundojnë nën përgjegjësinë e institucioneve. Të braktisur përfshihen në sistem, ndërsa ata që i sjellin (në shumë raste vetë prindërit) rikthehen në Shqipëri, përcjell Express.
Sipas “Il Gionarle D’Italia” nuk janë të pakta rastet, plot 5190 të mitur të huaj kanë ardhur në Itali dhe janë shpallur si “të braktisur”. Shifra vjen nga Ministria e Punës dhe nga zyrat e politikave sociale.
E pikërisht pas kësaj shifre, shkruan media italiane, fshihen dhe të miturit shqiptarë që me mashtrimin e tyre përfitojnë përfshirjen në shkolla e punë. Sipas të dhënave të majit të këtij viti të huajt e ardhur nga Ballkani kanë qenë 1662. Shifrat flasin për 2221 të mitur nga Gambia dhe 2123 të ardhur nga Egjipti.
Drejtuesi i qendrës Don Calabria në Verona Alessandro Padovani shprehet se përgjithësisht djemtë e mitur nisen nga Tirana dhe arrijnë në Veneto përmes autobusëve turistikë, raporton Express.
Fenomeni shqetësues është sinjalizuar në relacionin e një komisioni parlamentar italian ku diskutohej në detaje sistemi i mbrojtjes së të miturve të huaj në vend. Sipas këtij relacioni numri i të miturve( sidomos shqiptarë) që marrin përsipër të kryejnë këtë mashtrim është rritur dukshëm muajt e fundit dhe është kthyer në një fenomen që kërkon zgjidhje të shpejtë./ Burimi Il Gionarle D’Italia
