Shqipëria po shndërrohet në një nga destinacionet më tërheqëse të Mesdheut, falë ndërthurjes së trashëgimisë historike, qyteteve karakteristike, natyrës dhe zhvillimeve moderne, sipas një artikulli të botuar në median franceze TourMaG.com.
Nga Tirana dhe Kruja, te Shkodra e Durrësi, vendi ofron një udhëtim mes historisë dhe modernitetit, ndërsa investimet e reja po i japin një tjetër dimension turizmit shqiptar.
Shqipëria e veriut: Kulturë dhe modernitet
Një trashëgimi e pasur dhe një destinacion që po ndryshon me shpejtësi. E pozicionuar në zemër të rajonit mesdhetar të Evropës dhe Ballkanit, Shqipëria, një vend që për shumë vite ishte i izoluar, është hapur prej disa vitesh ndaj turizmit.
Infrastruktura dhe shërbimet turistike po përshtaten gradualisht me kërkesat e vizitorëve perëndimorë. Nga kryeqyteti, Tirana, deri në veri dhe në zonat bregdetare, vendi ndërthur gjurmët e historisë me investimet dhe zhvillimet e reja.
Tirana, një kryeqytet mes historisë dhe modernitetit
Tirana, me rreth 900 mijë banorë, pothuajse një të tretën e popullsisë së vendit, është një kryeqytet me pamje dhe stile të ndryshme arkitekturore.
Ndërtesave moderniste të viteve 1930 dhe atyre të periudhës komuniste, të ndërtuara pas Luftës së Dytë Botërore, u janë shtuar ndërtesa moderne dhe futuriste, që synojnë ta përfshijnë kryeqytetin në zhvillimet arkitekturore të shekullit XXI.
Rezultati është një peizazh arkitekturor i larmishëm, ku ndërthuren periudha dhe stile të ndryshme. Në qendër të qytetit ndodhet Sheshi Skënderbej, sheshi kryesor dhe këmbësor i Tiranës, kushtuar heroit kombëtar shqiptar.
Skënderbeu paraqitet edhe përmes monumentit të tij të njohur mbi kalë. Pranë sheshit gjenden Muzeu Historik Kombëtar, me mozaikun e madh në fasadë të krijuar në vitet 1980, Pallati i Kulturës, i ndërtuar në vitin 1963, Banka e Shqipërisë, e vitit 1938, si dhe Xhamia e Et’hem Beut, e ndërtuar në fund të shekullit XVIII.
Këto ndërtesa historike bashkëjetojnë me struktura të reja, si hoteli “InterContinental” dhe kulla moderne “Tirana’s Rock”, silueta e së cilës është projektuar në formën e fytyrës së Skënderbeut.
Gjurmët e diktaturës komuniste
Periudha e errët e diktaturës komuniste të Enver Hoxhës mund të njihet përmes Shtëpisë me Gjethe.
Ndërtesa, e cila dikur ishte selia e Sigurimit të Shtetit, sot shërben si muze dhe dokumenton sistemin e represionit, survejimit dhe propagandës, të përdorur nga shteti shqiptar gjatë periudhës komuniste.
Në mbrëmje, vizitorët mund të shijojnë atmosferën e gjallë të Tiranës dhe kuzhinën shqiptare në baret dhe restorantet e shumta të Pazarit të Ri dhe Bllokut, dy zona të njohura për jetën e natës dhe aktivitetin social.
Kruja dhe Kalaja e Skënderbeut
Rreth 40 kilometra në veri të kryeqytetit ndodhet Kruja, një qytet që tërheq vizitorët edhe për pozicionin e tij në shpatet e malit.
Kalaja e Krujës lidhet ngushtë me historinë e Gjergj Kastriot Skënderbeut, i cili në shekullin XV udhëhoqi rezistencën shqiptare kundër Perandorisë Osmane.
Kalaja, e rindërtuar në vitet 1980, përfshin një muze të madh, kushtuar Skënderbeut dhe ofron pamje të bukura drejt detit Adriatik.
Kruja është gjithashtu e njohur për Pazarin e Vjetër, ku disa artizanë vazhdojnë të prodhojnë me metoda tradicionale, këpucë dhe artikuj prej shajaku, përfshirë edhe veshje tradicionale për kokën.
Shkodra dhe Muzeu Kombëtar i Fotografisë “Marubi”
Rreth 80 kilometra më në veri ndodhet Shkodra, një qytet me rreth 150 mijë banorë, i vendosur rreth 30 kilometra larg detit Adriatik.
Qyteti ndodhet pranë Liqenit të Shkodrës, i cili shtrihet në kufirin mes Shqipërisë dhe Malit të Zi. Shkodra ofron dy pika kryesore interesi.
E para është Kalaja e Rozafës, e ndërtuar në shekullin XIV dhe e lidhur me periudhën veneciane. Rrënojat e saj shtrihen në një sipërfaqe të konsiderueshme në majë të një kodre dhe ofrojnë pamje të gjera mbi qytetin dhe liqenin.
E dyta është qendra e qytetit, veçanërisht rrugët Kolë Idromeno dhe G’juhadol, të njohura për shëtitoret, kafenetë dhe tarracat e shumta.
Një tjetër pikë e rëndësishme është Muzeu Kombëtar i Fotografisë “Marubi”, i cili ruan një koleksion të rëndësishëm fotografish, që dokumentojnë shoqërinë shqiptare përmes disa brezave të familjes Marubi.
Durrësi, qyteti antik pranë detit
Në të njëjtën gjerësi gjeografike me Tiranën ndodhet Durrësi, qyteti i dytë më i madh i Shqipërisë dhe një nga qendrat më të rëndësishme historike të vendit.
Për shkak të historisë së tij të gjatë, Durrësi ka qenë në periudha të ndryshme nën ndikimin e qytetërimeve dhe fuqive të ndryshme, përfshirë grekët, romakët, bizantinët, anzhuinët, venecianët dhe osmanët.
Qyteti ka qenë gjithashtu një pikë e rëndësishme në rrugët tregtare që lidhnin Lindjen me Perëndimin.
Historia e Durrësit mund të zbulohet veçanërisht përmes trashëgimisë arkeologjike.
Ndër monumentet më të rëndësishme është Amfiteatri Romak, i cili dikur mund të priste rreth 15 mijë spektatorë dhe sot ndodhet i rrethuar nga ndërtesat e qytetit modern.
Vizitorët mund të shohin gjithashtu gjurmët e mureve të lashta mbrojtëse dhe Muzeun Arkeologjik, i cili paraqet dëshmi dhe objekte nga periudhat e ndryshme historike të qytetit.
Durrësi, në zhvillim të shpejtë turistik
Durrësi po përjeton një zhvillim të rëndësishëm turistik. Qyteti lidhet me Italinë dhe portin e Barit përmes linjave të shumta të trageteve.
Sipas artikullit, Durrësi pritet të ketë edhe një marinë të re, ndërsa vazhdojnë të ndërtohen hotele të reja përgjatë bregdetit.
Çfarë duhet të dini para se të udhëtoni në Shqipëri?
Shqipëria mund të arrihet nga Parisi në Tiranë me fluturim direkt, me një kohë udhëtimi prej rreth 2 orë e 40 minuta. Për të hyrë në Shqipëri, vizitorët mund të përdorin pasaportën ose kartën e identitetit, nëse dokumenti është i vlefshëm. Monedha zyrtare e vendit është leku shqiptar.
Për të shijuar temperatura më të këndshme dhe për të shmangur fluksin e madh të turistëve gjatë muajve të verës, artikulli rekomandon udhëtimin në pranverë, veçanërisht në maj dhe qershor, ose në fillim të vjeshtës, në shtator dhe tetor.
