Kryeministri i vendit, Edi Rama ka ndarë një postim të gjatë në rrjetin social “X”. Ai i drejtohet organizatës Reporterët pa Kufij (RSF) lidhur me shqetësimet që kjo e fundit ka ngritur për ndikim politik mbi mediat dhe për cenimin e pavarësisë së tyre.
Rama thekson se vendi po ecën drejt Bashkimit Europian, duke nënvizuar Konferencën Ndërqeveritare që do të mbahet sot në Bruksel, duke shtuar se përmirësimi i mjedisit mediatik do të bëhet në bashkëpunim me BE-në.
Në përgjigje të akuzave, kreu i qeverisë i i referohet një analize e cila sipas tij është bazuar në mbi 106 mijë artikuj nga 47 media të monitoruara.
Postimi si më poshtë:
I dashur @RSF_inter,
Po udhëtoj drejt Brukselit, ku sot Shqipëria do të hedhë një tjetër hap të rëndësishëm në rrugën e saj drejt anëtarësimit në Bashkimin Evropian. Një pjesë thelbësore e këtij procesi është, sigurisht, si përparimi i arritur, ashtu edhe puna që mbetet për t’u bërë lidhur me mjedisin mediatik. Dhe këtë do ta bëjmë në bashkëpunim të plotë me BE-në.
Por, duke qenë se nuk kam marrë përgjigje nga ju pas ndarjes së raportit mjaft domethënës të gjeneruar nga një model i inteligjencës artificiale i zhvilluar nga një startup shqiptar, mendova se do të ishte e dobishme t’ju dërgoja edhe gjetjet e një analize pasuese nga i njëjti burim, këtë herë me një periudhë monitorimi të zgjeruar në 120 ditë, që përfshin 106 962 artikuj nga 47 media të monitoruara.
Shpresoj që do t’ju gëzojë fakti se, sa i përket tezës së njohur për një “mjedis mediatik të kapur”, sa më i madh bëhet kampioni i të dhënave, aq më e dobët bëhet kjo tezë.
Imagjinoni: treguesit empirikë e vendosin Shqipërinë 33 pikë përqindje nën pragun që lidhet me sistemet mediatike të kapura në mënyrë strukturore.
E pabesueshme, apo jo?
Por e vërtetë.
Përqindja e zërit të opozitës arrin 68.2%, ndërsa ajo e qeverisë është 31.8%. Edhe më domethënëse, edhe në mediat që zakonisht cilësohen si pro-qeveritare, dukshmëria e opozitës mbetet më e lartë se ajo e vetë qeverisë.
Për më tepër, kritikat ndaj qeverisë tejkalojnë mbulimin pozitiv gati pesë me një.
Vështirë të përputhet kjo me një realitet ku kritika heshtet, zërat e opozitës margjinalizohen ose pluralizmi mediatik është thjesht dekorativ.
Sërish, në një mjedis realisht “të kapur”, asgjë nga këto nuk do të ekzistonte.
Jo një peisazh ku dukshmëria e opozitës dominon edhe në mediat e konsideruara pro-qeveritare.
Jo një situatë ku kritika tejkalon pothuajse pesëfish mbulimin pozitiv ndaj qeverisë.
Jo një realitet ku zërat e opozitës janë vazhdimisht më të pranishëm në kategoritë kritike, të balancuara dhe pro-qeveritare të mediave.
Dhe sërish, këto nuk janë perceptime.
Janë fakte të matshme, të nxjerra nga një databazë prej më shumë se 106 mijë artikujsh të publikuar.
Sa më i madh bëhet kampioni i të dhënave, aq më e vështirë bëhet përputhja e këtyre gjetjeve me idenë e një mjedisi mediatik të kapur nga ndikimi qeveritar.
Shpresoj që raporti bashkëngjitur të jetë me interes për ju.
Do të jem i gatshëm të ndaj gjetje të tjera edhe në të ardhmen, në frymën e respektit të ndërsjellë, bashkëpunimit konstruktiv dhe angazhimit tonë të përbashkët ndaj atij destinacioni shpesh të vështirë, por gjithmonë të vlefshëm:
E vërteta.
