Kryeministri irakian Adil Abdulmahdi dënoi ashpër sulmin e mbrëmshëm të ushtrisë amerikane në të cilin u vra gjenerali Qasem Soleiman, duke nënvizuar se ai ka qenë simbol i fitores mbi ISIS-in.
Abdulmahdi deklaroi se me vrasjen e komandantit të njësisë elitare iraniane “Quds”, është ndezur fitili i luftës shkatërrimtare në tërë rajonin, dhe është shkelur integriteti dhe nderi i vendit të tij.
“Atentati ndaj një udhëheqësi zyrtar ushtarak irakian përbën armiqësi ndaj popullit, shtetit dhe qeverisë irakiane. Eleminimi i udhëheqësve ushtarakë nga vendet irakiane dhe vëllazërore (Irani) në territorin e Irakut është një shkelje e sovranitetit të vendit tonë, një sulm për nderin e këtij vendi. Për më tepër, ky sulm ndezi fitilin e një lufte shkatërruese në Irak dhe rajon. Sulmi gjithashtu bie ndesh me kushtet e qëndrimit të trupave amerikane në Irak”, deklaroi Abdulmahdi.
Kryeministri irakian po ashtu thirri Kuvendin në seancë të jashtëzakonshme për të marrë vendimet e nevojshme në kuadër të vërtetimit të pozitës zyrtare irakiane.
Presidenti amerikan, Donald Trump ka urdhëruar një sulm ajror në aeroportin e Bagdadit, nga ku mbeti i vrarë Gjenerali i Gardës Revolucionare të Iranit, Qasem Soleimani.
Në këtë sulm ajror u vra edhe Abu Mahdi al-Muhandis, shefi i policisë së Iranit, që njihen ndryshe edhe si Forcat e Mobilizimit Popullor, të cilat u konsideruan përgjegjëse për sulmin e fundit ndaj Ambasadës Amerikane në Bagdad. /e.s/
