Gara për Prokurorin e ri të Përgjithshëm ka shkaktuar përplasje të forta në Këshillin e Lartë të Prokurorisë.
Një kërkesë e kandidatit Ylli Pjetërnikaj për përjashtimin e anëtarit Vatë Staka nga procedura e përzgjedhjes solli kërkesa të tjera për përjashtime mes vetë anëtarëve të KLP-së, ndërsa mbledhja përfundoi pa vendim.
Kërkesa e Pjetërnikajt është depozituar më 30 korrik dhe bazohet, sipas tij, në konflikt interesi të Vatë Stakës, por KLP ende nuk e ka shqyrtuar. Gjatë mbledhjes së së premtes, situata u komplikua kur Staka kërkoi përjashtimin e anëtarit Zeqir Hodo nga shqyrtimi i kërkesës së Pjetërnikajt.
Staka argumentoi se Hodo kishte pasur komunikime me Pjetërnikajn edhe pasi ky i fundit ishte larguar nga pozicioni i këshilltarit pranë KLP-së. Sipas tij, Pjetërnikaj i kishte dërguar Hodos në një email privat draftin e një rregulloreje të Këshillit.
Hodo kërkoi kohë për t’u shprehur për kërkesën e Stakës, ndërsa këmbënguli që kërkesa e Pjetërnikajt të lexohej e plotë në mbledhje dhe të bëhej e ditur për publikun.
Debati u përshkallëzua kur anëtari Sokol Stojani argumentoi se fillimisht duhej të shqyrtohej kërkesa e Stakës për Hodon dhe më pas ajo e Pjetërnikajt. Pas këtij qëndrimi, Hodo kërkoi përjashtimin edhe të Stojanit, duke deklaruar se dyshonte në objektivitetin e tij.
Kështu, një kërkesë fillestare për përjashtimin e Stakës solli një zinxhir kërkesash mes anëtarëve: Staka kërkoi përjashtimin e Hodos, ndërsa Hodo atë të Stojanit.
Debati mes Hodos dhe Stojanit degradoi edhe në replika personale, me akuza për formimin dhe shkollimin e njëri-tjetrit. Në një moment, Stojani paralajmëroi se mund të kërkonte edhe përjashtimin e kryetares së KLP-së, Mirela Bogdani, pasi pretendoi se ajo kishte qeshur në mënyrë ironike gjatë diskutimit, informon TCH.
Situata solli reagimin e Ledina Rizës.
“Më vjen zor që jam në këtë tavolinë… të arrijë niveli i diskutimeve në të tilla banalitete nuk i takon kësaj tavoline”, tha ajo, duke kërkuar respekt për kandidatët dhe publikun.
Përplasjet vijnë ndërkohë që KLP është me vonesë në procedurën për zgjedhjen e Prokurorit të Përgjithshëm. Emrat e pesë kandidatëve nuk janë dërguar ende në ILDKPKI për verifikimin e pasurisë, ndërsa brenda javës së parë të dhjetorit duhet të ketë një emër të ri për drejtimin e Prokurorisë së Përgjithshme.
Në garë janë prokurori i SPAK Adnan Xholi, ish-Prokurorja e Përgjithshme e Përkohshme Arta Marku, prokurorja pranë Eurojust Fatjona Memçaj dhe prokurorët e Tiranës Rovena Zoto dhe Ylli Pjetërnikaj.
KLP duhet të rendisë tre kandidatët më të kualifikuar dhe t’ia dërgojë listën Kuvendit për votim.
