U krijuan për më shumë komunikim e lehtësira, por rrjetet sociale po sjellin probleme të ndryshme për shumë persona që bien pre e krimit kibernetik. Krime të cilat sjellin pasoja të rënda jo vetëm sociale, por edhe ekonomike. Denoncimet për vjedhjen e adresave të Facebook, janë kthyer në fenomen të përditshëm të policisë, ndërsa qëllimet e këtyre krimeve kibernetike janë nga më të ndryshmet.
Një 19-vjeçare nga Tirana, u mashtrua në Facebook për përfitime të shumave monetare, nëse i plotësonte një 30-vjeçari dëshirën për ti servirur foto nudo.
Të dy ishin njohur në Facebook, dhe flisnin prej kohësh, por asnjëherë nuk ishin takuar. 30-vjeçari R.T. i proceduar penalisht tashmë nga policia, i kërkonte vajzës t’i dërgonte foto intime, duke i premtuar shpërlime të ndryshme. E mashtruar nga ky shtetas, vajza e re i dërgoi atij disa foto, por asnjëherë nuk mori shpërblim. Madje, pas disa kohësh, ajo kërcënohej se do t’i publikoheshin fotot, nëse nuk i jepte para 30-vjeçarit. Pasi e reja bëri denoncim, ndërhyri policia e cila e ndaloi shtetasin R.T. Por, ky ëhstë njëri prej shumë rasteve të ngjashme që ndodhin në Shqipëri.
Të shumta janë rastet kur persona të caktuar, hakojnë adresa të vajzave dhe i bëjnë presion për publikimin e fotove intime. Por nuk mungojnë as rastet grabisin fotot nga adresa personash dhe hapin llogari të reja me postime ofenduese. Viktima të sulmeve në Facebook janë kryesisht vajza të reja./Javanews/a.m.
