Vendosja e një sasie eksplozivi te një autobus shërbimesh funerale, për hakmarrje ndaj pronarit të tij, i ka kushtuar një dënim me 2 vjet burg një të riu në Tiranë.
Përveç këtij veprimi, i pandehuri Erion Duçka është deklaruar i fajshëm nga Gjykata edhe për kundërshtimin e punonjësit të policisë, që e ka ndaluar pas ngjarjes. Vendimi ndaj të akuzuarit për ngjarjen e ndodhur në gusht të vitit të kaluar në Tiranë është shpallur pak ditë më parë në Gjykatën e kryeqytetit. Ai u shpall fajtor për “mbajtje pa leje dhe prodhim të armëve shpërthyese dhe municionit”, “shkatërrim të pronës me eksploziv” dhe “kundërshtimit të punonjësit të policisë së rendit publik”, raporton “Panorama”..
Gjatë gjykimit ai shfaqi pendim për veprimet e kryera. Ngjarja për të cilën u fajësua Duçka u regjistrua më 25 gusht 2016, në rrugën “Arben Minga”, në Tiranë. Rreth orës 03:40 të kësaj date, Policia e Tiranës u njoftua për një shpërthim të ndodhur në një mjet autobus të parkuar në këtë rrugë, në pronësi të shtetasit K.R.
Lënda eksplozive, 200 gramë tritol, ishte vendosur në gomën e pasme të autobusit dhe kishte shkaktuar çarje të gomës, dëmtim të parafangos, si dhe të llamarinës sipër kësaj gome ku ishte vendosur lënda plasëse.
Vetëm pak minuta pas ngjarjes, në afërsi të shpërthimit një patrullë policie e Komisariatit të Policisë nr. 4 ka vënë re një person që lëvizte me biçikletë. Në momentin që makina e policisë është afruar, ai ka tentuar të largohej duke i dhënë biçikletës me shpejtësi nëpër rrugica.
Në ikje e sipër, ai ka lënë biçikletën dhe ka tentuar të largohet me vrap, si dhe ka tentuar të godasë disa herë policin e patrullës, në momentin që ky i fundit e ka kapur. Personi me biçikletë ka qenë i pandehuri Duçka.
Fillimisht ai ka pretenduar se nuk kishte lidhje me ngjarjen. Më pas, ai ka pranuar autorësinë dhe ka rrëfyer motivin.
“Ai ka deklaruar se lëndën eksplozive tek autobusi e ka vendosur ai dhe arsyeja ka qenë pasi ka pasur disa konflikte me të zotin e tij, pasi ky i fundit i shante babain e tij, duke i thënë spiun, për shkak se babai i Erionit kishte punuar në SHIK”, thuhej në vendimin e Gjykatës.
Për të provuar fajësinë e të riut, Prokuroria ka paraqitur në gjykim edhe pamjet filmike të një kamere sigurie pranë vendit të ngjarjes. Në pamje duket një person që ndez lëndën eksplozive dhe largohet me vrap, duke marrë biçikletën e parkuar para autobusit dhe ndjek vazhdimin e rrugës e më pas shikohet shpërthimi i lëndës eksplozive./a.m.
