Këshilli i Bashkisë Kukës sot zhvilloi mbledhjen e fundit për këtë vit, duke miratuar të gjitha pikat e rendit të ditës veçanërisht atë të buxhetit vjetor, i cili arrin në vlerën e 1143548 000/ -60% e kësaj vlere do të shkoj për pagat e punonjësve të bashkisë, ndërsa 40% e shumës do përkthehet në realizimin e investimeve në 38 vepra publike në këtë njësi të qeverisjes vendore.
Pika që ngjalli mjaft debate e tensione në sallë ishte ajo e taksave vendore për vitin 2025.
Fillimisht këshilltari Astrit Dobrushi kërkoj informacion se cila është baza ligjore ku Drejtoria e Tatimeve në Bashkinë Kukës është bazuar për hartimin e taksave për vitin e ardhshëm, por përgjigjja e drejtorit të kësaj zyre Përparim Guri ka agravuar debatin.
Një situatë aspak e denjë për diskutim ishte edhe debati e fjalori mes përfaqësuesve të një shoqate të energjisë së rinovuar dhe kryebashkiakut të Kukësit Albert Halilaj.
Debati degradoi mes përfaqësuesve të kësaj shoqate dhe kryebashkiakut:
Avokatja: Të lutem zotëri, të lutem! Është shumë dominuese, ishte një taksë vendimore, që zë një vend të konsiderueshëm në buxhetin tuaj.
Kryebashkiaku: Herë tjetër, më fal, kur të vish herë tjetër….
Avokatja: Jo nuk vij herë tjetër, por erdha me të pa një herë….
Kryebashkiaku: Jam shumë i bukur…. (Të qeshura në sallën e mbledhjes).
Avokatja: Nuk kamë ardhur me të pa ty. E kam shumë më të bukur atë në shtëpi unë.
Kryebashkiaku: Me sjellë statusin e shoqërisë…
Avokatja: Jemi të prezantuar me e-mail në rrugë zyrtare. Zotëri, e para, trego respekt një herë, se nuk jemi te kafja këtu edhe më shiko një çik në sy, sepse këtë lloj komunikimi nuk është i denjë të paktën për postin që mbani. Dhe nëse ti do të kesh mirësinë të dëgjosh se ka nja 30 veta këtu….
Kryebashkiaku: Më kanë votuar qytetarët e Kukësit dhe do të mbroj interesat e tyre.
60% e taksave vendore zënë taksimet nga Hec-et në Bashkinë Kukës.
