Brilant Martinaj, i shpallur tashmë në kërkim ndërkombëtar për vrasjen e efektivit të FNSH-së, Xhulio Prelës, nuk është një emër i panjohur.
Dy vite më parë, kur ai ishte vetëm 19 vjeç, Brilanti shfaqej në video në rrjete sociale duke udhëtuar me makina luksoze me shpejtësi të lartë, si dhe duke mbajtur me vete armë zjarri.
Udhëtimi i tij gjithashtu shoqërohej me megafon si ato të policisë, duke bërë thirrje që makinat e tjera t’i hapnin rrugën.
Në një tjetër video të publikuar në profilin personal të Brilantit, shikohet një bisedë me një polic rrugor, të cilin 18-vjeçari e pyet nëse e njeh se kush është, pa iu dridhur qerpiku, edhe pse në automjet mbante armë apo shpejtësia me të cilën udhëtonte ishte e lartë, shkruan Panorama.
Polici tërhiqet nga ndalimi, shkëmben disa batuta me të riun dhe më tej e lë të vijojë i qetë udhëtimin. Sakaq, Brilant Martinaj mësohet se është shpallur në kërkim ndërkombëtar vetëm për faktin se natën e krimit, në 5 dhjetor 2020, ai rezulton të ketë lëvizur me makinë pikërisht në aksin rrugor ku u vra Xhulio Prela.
Disa ditë pas ngjarjes, Brilant Martinaj është larguar në drejtim të Turqisë. Policia njoftoi se Prela dhe 2 autorët e dyshuar, kanë filluar konfliktin për shkak të dritave të gjata të makinës. Efektivi i FNSH-së, Xhulio Prela u ekzekutua në orët e para të mëngjesit të datës 5 dhjetor me një plumb në gjoks, teksa po kthehej nga Shkodra për në Tiranë.
26- vjeçari është nisur nga Tirana për në aeroportin e Rinasit në orën 01:00 të natës për të marrë një mikun e tij e për ta dërguar drejt fshatit Kosmaç në Shkodër.
Dje policia njoftoi se kishte arrestuar njërin prej autorëve të dyshuar, ndërsa Martinajn e ka shpallur në kërkim. Sipas policisë, ngjarja ka ndodhur për një konflikt të çastit mes viktimës dhe autorëve të dyshuar.
/a.r
