Presidenti rus Vladimir Putin e ka përdorur fjalimin e tij të Ditës së Fitores në Sheshin e Kuq të Moskës për të justifikuar luftën e tij në Ukrainë dhe për të denoncuar NATO-n.
Ndërsa fliste përpara qindra ushtarakëve, presidenti rus u shpreh se po zhvillonte një luftë “të drejtë” dhe e quajti Ukrainën një “forcë agresive” që po “armatoset dhe mbështetet nga i gjithë blloku i NATO-s”.
Komentet e tij vijnë mes festimeve më të zbehta se zakonisht në të gjithë Rusinë për të shënuar festën më të madhe kombëtare të vendit, që përkujton fitoren e Bashkimit Sovjetik ndaj Gjermanisë naziste.
Përpara festimeve, të kufizuara për arsye sigurie mes frikës nga sulmet ukrainase, Rusia dhe Ukraina ranë dakord të respektonin një armëpushim tre-ditor, i shpallur nga presidenti amerikan Donald Trump të premten.
Pas paradës, ministria ruse e mbrojtjes akuzoi Ukrainën për shkeljen e armëpushimit, pa dhënë detaje.
Siç shkruan BBC, për herë të parë pas shumë vitesh, në paradën e Ditës së Fitores në Moskë nuk u shfaqën mjete të blinduara apo raketa balistike.
Megjithatë, nën masa të rrepta sigurie, personeli ushtarak marshoi në numër të madh nëpër Sheshin e Kuq.
Duke iu drejtuar turmës, Putini e nisi fjalimin duke përkujtuar sakrificat e ushtarëve sovjetikë gjatë Luftës së Dytë Botërore.
“Vepra e madhe e brezit fitues frymëzon ushtarët që po realizojnë objektivat e operacionit special ushtarak sot,” tha ai, duke iu referuar luftës në Ukrainë që vazhdon prej më shumë se katër vitesh.
“Ata po përballen me një forcë agresive të armatosur dhe të mbështetur nga i gjithë blloku i NATO-s. Dhe pavarësisht kësaj, heronjtë tanë po ecin përpara.”
Lideri rus vazhdoi duke lavdëruar qytetarët e Rusisë, duke përmendur kontributin e punëtorëve në përpjekjet e luftës, përfshirë shkencëtarët, shpikësit, korrespondentët ushtarakë, mjekët dhe mësuesit.
“Pavarësisht se si ndryshojnë taktikat ushtarake, e ardhmja e vendit sigurohet nga populli,” tha ai.
Menjëherë pas fjalimit, topat qëlluan disa herë radhazi përpara se një bandë ushtarake frymore të luante muzikë.
Mes të ftuarve të huaj ishin lideri i Bjellorusisë Alexander Lukashenko, mbreti i Malajzisë Sultan Ibrahim dhe presidenti i Uzbekistanit Shavkat Mirziyoyev.
Kryeministri sllovak Robert Fico, i vetmi përfaqësues i BE-së që mori pjesë, u fotografua gjithashtu duke u takuar me Putinin në Kremlin para paradës.
Shumë më pak liderë botërorë morën pjesë krahasuar me paradën e vitit të kaluar për 80-vjetorin, ku morën pjesë 27 liderë, përfshirë presidentin e Kinës Xi Jinping dhe presidentin e Brazilit Luiz Inácio Lula da Silva.
