Kurban Bajrami i këtij viti mbërriti me një frymë tjetër më të heshtur, më të përmbajtur, por ndoshta edhe më domethënëse se kurrë.
Në vend të tregjeve plot zëra dhe kafshë për kurban, shumë qytete të botës islame panë një festë “të përmbysur” nga realiteti ekonomik: inflacioni në rritje, humbja e fuqisë blerëse dhe pasojat e gjata të pandemisë COVID-19. Në vend të bollëkut, këtë vit dominuan kursimi dhe reflektimi.
Për miliona besimtarë, sakrifica nuk ishte vetëm therja e një kafshe, por privimi nga shumë të mira që më parë merreshin si të mirëqena. Dhe megjithatë, në xhami të mbushura plot, në lutje të ngritura njëzëri dhe në ndarjen e kurbanit më nevojtarët, u dëshmua se shpirti i Kurban Bajramit mbetet i gjallë.
Kjo festë që përkujton bindjen dhe devotshmërinë e Profetit Ibrahim këtë vit u mishërua në sakrificën e përditshme të njerëzve të zakonshëm që, përkundër mungesave, nuk hoqën dorë nga besimi, solidariteti dhe shpresa.
Besimtarët myslimanë në mbarë botën festojnë këtë të premte, 6 qershor, Kurban Bajramin. Por, këtë vit festa u shënua nga shpenzime të paktën, harmonin e vakët, rritje çmimesh dhe më pak kurban çka ndikoi në zbehjen e atmosferës tradicionale festive.
Në kryeqytetin e Indonezisë, Xhakarta, besimtarët myslimanë mbushën rrugët dhe xhaminë e madhe Istiqlal për faljen e mëngjesit të Bajramit të premten.
Kurban Bajrami, i njohur si “Festa e Sakrificës”, përkon me përfundimin e ritualeve të Haxhit në Arabinë Saudite. Kjo është një festë e gëzueshme, ku ushqimi ka rol qendror: besimtarët blejnë dhe therin kafshë, ndërsa dy të tretat e mishit ua shpërndajnë të varfërve.
Jashtë Xhakartës, tregu i gjedhëve në Jonggol gumëzhinte nga tregtarët që shpresonin të shisnin kafshë për sakrificë. Edhe pse shitjet u rritën në ditët para festës, shumë shitës thanë se kanë humbur klientë vitet e fundit për shkak të vështirësive ekonomike pas pandemisë së COVID-19, por dhe situata e luftërave në vend po bëjnë të vetën.
Sipas të dhënave zyrtare të Bashkisë së Xhakartës, këtë vit janë regjistruar 35,133 kafshë për kurban, një rënie prej 57% krahasuar me vitin e kaluar.
Qeveria e Indonezisë ka shpallur të hënën ditë pushimi shtesë pas festës së së premtes, për t’u dhënë qytetarëve më shumë kohë me familjet. Pritet që festa e Kurban Bajramit të nxisë aktivitetin ekonomik në vend, ku konsumi i familjeve përbën më shumë se 50% të PBB-së. Megjithatë, analistët parashikojnë një ngadalësim të shpenzimeve familjare në vitin 2025.
