Ministri i Mbrojtjes, Niko Peleshi deklaroi sot se “Samiti i Madridit është një moment i ri historik për NATO-n”.
“Me një qasje të re për shkurajim dhe mbrojtje, aleanca garanton paprekshmërinë e çdo cm të vendeve anëtare duke mbajtur si objektiv primar mbrojtjen kolektive”, tha Peleshi.
Hapja e rrugës për anëtarësimin e Suedisë dhe Finlandës në NATO, sipas tij, “fuqizon Aleancën dhe dëshmon nivelin më të lartë të unitetit dhe kohezionit mes vendeve anëtare”.
“Rusia tashmë përbën një kërcënim të drejtpërdrejtë për sigurinë dhe paqen. Qëndrimi ndaj agresionit të pajustifikuar e të paligjshëm të Rusisë ndaj Ukrainës, tregoi raportet e vendeve më liritë themelore dhe rendin botëror të bazuar në rregulla. Tashmë është e qartë se Kina përbën sfidën sistematike të sigurisë euro-atlantike”, tha ai.
Peleshi theksoi se “në Konceptin e Ri Strategjik NATO2030, Ballkani Perëndimor cilësohet qartësisht si interes strategjik i Aleancës, NATO”.
“Një takim i posaçëm i Ministrave të Mbrojtjes, iu dedikua Ballkanit Perëndimor. Integrimi euroatlantik i Ballkanit Perëndimor është garancia e vetme për paqe, siguri dhe prosperitet në rajonin tonë”, tha ai.
/e.d
