Ermal Mamaqi nuk i ka qejf intervistat. Mos u lodhni kot të gjeni faqe gazetash me pyetje-përgjigjet e tij. Tejet popullor dhe i gatshëm të ofrojë humorin e zgjuar dhe të qeshurat pafund për këdo që sheh dhe ndjek shfaqjet e tij, ai nuk ka preferuar të ulet e të shkruajë ato që mendon për veten dhe gjërat që e rrethojnë.
Megjithatë Mamaqi e pranoi me dëshirë që të japë një intervistë për revistën JAVA. Që të kuptoni se çfarë do të lexoni nesër në faqet e revistës, po publikojmë një pyetje të Lorenc Vangjelit, shoqëruar me përgjigjen e “Mister 1.7 milion like”:
Nëse “like”-t në faqen tënde të Facebook-ut do të ishin vota, (janë rreth një milion e shtatë qind mijë), e mendon se mund të konkuroje lehtësisht për President, nëse kreu i shtetit do të zgjidhej nga populli?
Kjo pyetje të vajti vetë në mend apo e ke biseduar më parë me Ilir Metën, sepse e di që ai është kingu që bën kingmaker-in? Të të them një sekret: kur e kam folur me Doktorin që më tha se e kishte pak problem se do të mërzitej Bujari nëse merrte në nishan emrin tim si president, Rama i shkruante SMS Lul Bashës që t’i dërgonte shoqes së ngushtë të gruas sime një tekst në viber: Të lutem më thuaj nëse mund të ndodhë mrekullia! Domethënë nëse pranoja të bëhesha President. Por unë e kam mendjen top, edhe sikur të më quanin Bamir që nuk do të hyj në politikë. Nuk kam asnjë ambicje vetjake. Pastaj as nuk kam vrarë, as nuk kam vjedhur, as nuk jam marrë me drogë dhe as nuk kam diplomë universiteti fallso. Pra nuk plotësoj asnjë kriter për t’u bërë deputet dhe jo më të bëhem president. Megjithatë, siç ka thënë në gusht të vitit 1989 zoti Sali Berisha, atëherë intelektual në takim me Ramiz Alinë, kurrë mos thuaj kurrë! Kështu që kur të më bëhet tre milion “like”, mund edhe ta ndryshoj mendjen. Tani për tani mendoj se do të ishte mirë që të kishim një kurs këmbimi sipas tabelës: një like barabar me një votë, barabar me një euro. Like i thërrasin shkurt edhe Ilir Metës? E sheh që kjo është një arsye që të më ecë mbarë në jetë?
