Njëra prej veprave më të interpretuara në botë, “Bolero” e kompozitorit francez Maurice Ravel, është shndërruar në pasuri publike, 88 vjet pas interpretimit të parë në Operën e Parisit.
“E kemi zakon të themi se në botë, çdo dhjetë minuta luhet vepra ‘Bolero’. Pasi që vepra zgjat 17 minuta, i bie që ajo dëgjohet gjatë gjithë kohës në botë”, ka thënë për “France Presse”, Laurent Petitgirard, kompozitor dhe kryetar i Shoqatës së Autorëve të Francës, transmeton “Koha Ditore”.
Vepra simfonike u kompozua më 1928 e për herë të parë u interpretua më 22 nëntor të atij viti, por si muzikë baleti, të cilën balerina e njohur ruse, Ida Rubinstein, ia porositi kompozitorit me nam të cilin e kishte mik. Ndërkaq ajo ishte muza e tij.
“Është një vepër e thjeshtë pa kurrfarë synimi të virtuozitetit”, kishte thënë vetë Raveli, përderisa Petitgirard konsideron se kjo është një vepër precize e eksperimentale. Vepra të cilën e kanë interpretuar dirigjentët më të njohur, si Arturo Toscanini, Seiji Ozaëa, Claudio Abbado e Pierre Boulez, ka qenë inspirim për shumë koreografë, në mesin e të cilëve edhe Maurice Bejart.
“Boleroja” është bërë pasuri publike prej ditës së parë të majit edhe pse këtë status në Francë veprat e marrin 70 vite pas vdekjes së autorit. Raveli vdiq në vitin 1937. Meqë vepra e tij u interpretua për herë të parë më 1938, i kishte të drejtat autoriale për 70 vjet deri më 2008. Por pas kësaj, për tetë vjet pati një betejë me pasardhësit e tij në lidhje me të këto të drejta. Ravel (1875-1937) ka qenë kompozitor e pianist francezo-bask i periudhës së impresionizmit. Muzika e tij është e ndjeshme, e pasur dhe e ashpër. Interpretimi i veprave pianistike si “Jeux d’eau”, “Miroirs” dhe “Gaspard de la nuit” kërkojnë përgatitje të lartë teknike. Për publikun e gjerë më së shumti ishte i njohur me “Boleron” për të cilën ai kishte thënë se është “vepër për orkestër pa muzikë”. (B.an)
