Gjykata Administrative e Apelit pritet të zhvillojë më 11 maj të këtij viti procesin gjyqësor mes IKMT dhe kompanisë Gener 2. Paralelisht me të, po kjo gjykatë do të marrë në shqyrtim kërkesën e IKMT që është shprehur për pavlefshmëri të lejes së ndërtimit ndaj subjektit në fjalë. Nga ana tjetër edhe Gener 2 kërkon shfuqizimin e akteve.
Në njoftimin zyrtar të Gjykatës mësohet se treshja gjykuese janë Enkelejda Metaliaj (Softa), Arjana Qafa dhe Ankelina Gazidede.
Beteja mes IKMT dhe Gener 2 që ka nisur ndërtimin e një kompleksi gjigand vetëm 10 metra larg digës së liqenit pritet të marrë drejtim nga vendimi i 11 majit, ndërsa shqetësues është fakti se as ambientalistët e shoqërisë civile, apo Presidenti i Republikës nuk janë shprehur për këtë masakër mjedisore që po i ndodh zonës së Liqenit Artificial të Tiranës.
Gener 2, e pajisur me leje ndërtimi në kohën kur Bashkia drejtohej nga Lulzim Basha, pritet të ndërtojë në mbi 20 mijë metra katrorë.
Në vitin 2014, Basha firmosi ndërtimin e 5 kullave në favor të kompanisë Gener 2, ndërsa deputetë të Partisë Socialiste nisën një fushatë denoncimi kundër ndërtimeve të sapofirmosura.
Në atë kohë, Bashkia e Tiranës u mbrojt me faktin se toka ishte private dhe se ajo nuk cënonte hapësirat publike pranë Parkut të Liqenit. “Projekti aktual nuk prek asnjë centimetër të parkut të Liqenit por ruan kompleksin e pishinave dhe kompleksin sportive” – ishte qëndrimi i Bashës.
Sot, opozita, Nishani dhe ambientalistët janë përballë pyetjes se a do të jenë kaq të zellshëm më ndërtimin e kompleksit 17 katesh sa ç’janë me kauzat e tjera po te Liqeni? (javanews.al / a.r)
