Në dëgjesën publike të mbajtur për të diskutuar për ligjin për bastet sportive, kryeministri Edi Rama i dha fjalën edhe kryetarit të Federatës Shqiptare të Atletikës, Gjergj Ruli.
Rama tha se Gjergj Ruli ka qenë dikur mentor i tij kur luante tek Dinamo.
Gjergj Ruli deklaroi se është pro hapjes së basteve sportive. Ai tha se nuk ka përse të vijohet hipokrizia.
Ai tregoi se të gjithë presidentët e sporteve në vend kanë vënë vetë baste dhe ky është një ves, që sipas tij, ka lindur nga lashtësia. “Mos të bëhemi hipokritë. Kam parë sesi kur ishin në hotel, vinim baste presidentët e sporteve. Të ishte për të ndaluar veset, i bie që duhet të ndalojmë edhe rakinë, edhe birrën”, tha Ruli.
Diskutimi
Edi Rama: Ju prezantoj me trajnerin e atletikës. Është ai që ka shpallur Luiza Gegën kampione të Europës, duke lënë gjermanët mbrapa. Ka ecur përpara nesh në Europë, duke fituar medalje dhe ka shumë meritë për këtë gjë. Meqenëse m’u dha rasti, më lejoni ta them se Gjergji ka qenë mentori im kur luaja basketboll te Dinamo. Ishte tepër i përkushtuar, rrinim edhe jashtë orarit.
Gjergj Ruli: Le të hapen bastet, mos gjëmojmë njerëzit nga mbrapa. Kjo gjë ka ndodh që në kohën e Romës, poshtë-lart. Hapi o burrë i dheut të bëhet sporti, mos të shkojnë paratë nëpër duart e pista dhe vriten për lekët. Këtu jetojmë, nuk është vend i madh, e dimë çfarë ndodh, kështu që të hapen, policia mos të rrijë kape Gjergjin, kape Fidelin. Mos të bëhemi hipokritë. Kam parë sesi kur ishin në hotel, vinim baste presidentët e sporteve. Të ishte për të ndaluar veset, i bie që duhet të ndalojmë edhe rakinë, edhe birrën.
g.kosovari
