Policia italiane arrestoi pasditen e 3 shtatorit në Viterbo, dy burra me origjinë turke të dyshuar për planifikimin e një sulmi gjatë procesionit tradicional të Macchina di Santa Rosa. Mediat italiane raportojnë se të dy u ndaluan brenda një B&B të vendosur në pjesën e sipërme të qendrës historike, përgjatë rrugës së procesionit.
Sipas autoriteteve, atyre iu gjetën një mitraloz, disa pistoleta, karikatorë dhe municione. Hetimet fillestare tregojnë se shënjestra mund të ketë qenë turma ose vetë kulla, një simbol fetar i qytetit.
Hetuesit tani po përpiqen të rindërtojnë lëvizjet e dy burrave të arrestuar, mbërritjen e tyre në qytet, kontaktet e tyre në ditët e mëparshme dhe objektivin aktual të sulmit të dyshuar. Hipoteza që po shqyrtohet është se të dy ishin pjesë e një grupi më të madh ose po vepronin sipas urdhrave të individëve të lidhur me krimin e organizuar turk.
Kjo bëri që të mblidhet urgjentisht Komiteti i Sigurisë Publike i cili angazhoi në operacion njësi speciale si NOCS (Policia Kombëtare), njësitë e qenve, u mobilizuan snajperët e vendosur në çati, si dhe u përforcua siguria përgjatë gjithë rrugës së procesionit.
Si një masë e jashtëzakonshme Makina u transportua me dritat e rrugës të ndezura, një vendim i paprecedentë në historinë e kohëve të fundit të ngjarjes, e cila tradicionalisht mbahet në errësirë për të theksuar ndikimin dramatik të kullës së ndriçuar.
Macchina di Santa Rosa është një kullë afërsisht 30 metra e lartë, e mbajtur mbi supet e rreth njëqind burrave, të njohur si “hamall”, që kalojnë nëpër rrugët e qendrës së qytetit të Viterbos çdo vit. Eventi zhvillohet çdo 3 shtator në nder të Santa Rosa-s, shenjtores mbrojtëse të qytetit, dhe është njohur si Trashëgimi Kulturore Jomateriale e Njerëzimit nga UNESCO. Struktura, e rinovuar çdo pesë vjet, përfaqëson besimin dhe kohezionin e komunitetit të Viterbos. Tradita dikton që transporti të bëhet në errësirë, me dritat e rrugës të fikura plotësisht, për të nxjerrë në pah dritën e Macchina-s, e cila shkëlqen falë qindra dritave të integruara në strukturë. Ky ritual evokues ka një vlerë të fortë simbolike: drita e Santa Rosa-s që udhëheq qytetin nëpër errësirë. Pikërisht për këtë arsye, ndezja e dritave të rrugës gjatë procesionit shënoi një ndarje historike që tronditi ndjenjat fetare dhe të identitetit të shumë qytetarëve.
I pranishëm në procesion ishte dhe zëvendëskryeministri Antonio Tajani.
