Preç Zogaj thotë se kritikat ndaj Ismail Kadaresë, më shumë për jetën e tij sesa për veprën, kanë ndodhur sepse “mendja e shqiptarëve ka një formatik sektar”.
I ftuar në emisionin “Të Paekspozuarit” në MCN TV, Zogaj tha se Shqipëria më mirë të kishte Ismail Kadarenë, sesa një të burgosur më shumë në diktaturë.
“E kemi gjykuar sepse mendja e shqiptarëve ka një formatim sektar. E sheh me optikën e biografisë. Nuk gjykon çfarë, por kush. Mendimi i iluminuar në perëndim apo edhe në lindje, kur vjen fundi gjykon çfarë solle ti dhe jo kush je ti. Ato janë të lidhura, por nëse ke sjellë diçka me vlerë, do të thotë se je dikush me vlerë.
Këtu ndodh shumë sepse nuk ka as shumë filtra kritikë. Ne kemi studiues, por nuk ka krijuar hierarki vlerash të pacënueshme që të argumentojë për këdo. Paul Johnson thotë se njerëzit e shquar, janë si ne, në manifestimin e dobësive njerëzore, por ne nuk jemi si ata në manifestimin e talentit dhe gjenisë. Ky është dallimi. Nëse futemi te çdo njeri do të gjejmë gjithçka.
Kam patur këtë pikëpamje, Kadare ka patur një detyrë, të ishte rojtari i dhuntisë së tij. Shkrimtari, e fiton herët vetëdijen se sa vlen. Migjeni ka qenë i vetëdijshëm se sa i talentuar është. Shkrimtari e fiton vetëdijen në një periudhë X.
Në kushtet e tiranisë, Kadare është realizuar si shkrimtar i madh krysisht në tirani. Titujt që po përmendim janë në tirani.
Nuk është vetëm zakoni që për atë që largohet të flasim mirë, por detyra e tij ishte të ruante dhuntinë. A do të kishte vlerë më shumë për Shqipërinë, vepra e Kadaresë që krijoi të vetmen urë të Shqipërisë me Përëndimin, apo një i burgosur më shumë?”, tha Zogaj.
/a.r
