Biznesmeni holandez Dick Peschar u shpall i zhdukur ditën e shtunë por ditën e djeshme, policia mundi ta gjente në një hotel “Hilton” në Amsterdam. Vetë biznesmeni deklaroi se ai ishte rrëmbyer nga mafia shqiptare, por, po sipas tij, ishte liruar pasi shqiptarët kishin marrë vesh se policia po kërkonte Peschar.
Në hetimin e saj të parë gjatë nisjes së kërkimit për biznesmenin, policia pati gjetur makinën e Peschar në një rrugicë të kryeqytetit holandez. Aty ka gjetur dhe gjurmë gishtërisnj, që po sipas hetimit nuk rezultojnë të jenë të asnjë bande shqiptarësh.
Por nuk përfundon me kaq. Policia ka gjetur dhe një e-mail të vetë biznesmenit, dërguar një mikut të tij, ku i thoshte se nuk ishte marrë peng, ndryshe nga çfarë ai mund të kishte dëgjuar në media.
Pra me pak fjalë, historia e rrëmbimit ishte një sajesë e tërë.
Në të kundërt, versioni i vetë Peschar për median ka qenë plotësisht ndryshe.
“Ata janë njerëz për të cilët mund të flasësh pak. Me këtë punë merren, grabisin dhe vrasin, ç’mund të thuash tjetër”, pati thënë ai përpara mediave, fill pas “gjetjes” së tij.
Ndërkohë policia ka nisur një hetim nga biznesmenit Peschar, pasi dyshohet se është përfshirë në një skandal evazioni fiskal dhe pastrim parash./java/a.k
