Policia e Kurbinit reagon lidhur me një lajm të publikuar në media ku gazetari Julian Shota, denoncoi se është kanosur gjatë kryerjes së detyrës si dhe i ka dërguar mesazh shefit të Komisariatit të Policisë Kurbin ku i ka kërkuar ndihmë dhe ky i fundit nuk i është përgjigjur.
Lidhur me këtë rast sqarohet se nga specialistët e Seksionit për parandalimin dhe hetimin e ngjarjeve kriminale në Komisariatin e Policisë Kurbin, u referuan materialet në Prokurorinë e Rrethit Gjyqësor Kurbin, në ngarkim të shtetasit Llesh Buraku 53 vjeç, banues në Kurbin, për veprën penale “Kanosje për shkak të detyrës”.
Ai akuzohet pasi këtë të hënë, rreth orës 15:00, është paraqitur pranë Komisariatit të Policisë Kurbin gazetari Julian Shota, i cili ka kallëzuar se rreth orës 07:00, ka shkuar për të pasqyruar ngjarjen e ndodhur në lokalin ku i është vendosur lëndë eksplozive, dhe është kërcënuar me armë zjarri nga pronari u lokalit, për moslejimin e filmimit të vendngjarjes.
Me marrjen e informacionit nga njoftimi i gazetarit tek Policia e Lezhës rreth orës 09:00, është ngritur grupi hetimor nën drejtimin e drejtuesit të Prokurorisë së Kurbinit, për sqarimin e plotë të rrethanave të ngjarjes, duke kryer të gjitha veprimet hetimore konform rregullave.
Nga kontrollet e ushtruara në ambientet në pronësi të Burakut, nuk është konstatuar asnjë armë zjarri apo send tjetër i kundraligjshëm.
Gjithashtu, në lidhje me sms-në e publikuar të dërguar nga shefi i Komisariatit të Policisë Kurbin shtetasit J.Sh., “sqarojmë se nuk ka lidhje me ngjarjen, pasi mesazhi që shtetasi Julian Shota, pretendon se i ka dërguar shefit të Komisariatit Kurbin ku i shpjegon ngjarjen dhe i kërkon ndihmë, nga verifikimet hetimore ka rezultuar se nuk i është dërguar fare shefit të Komisariatit Kurbin, duke mos u vënë në dijeni ai se çfarë po ndodhte”.
Policia e Kurbinit thotë se, është e gatshme në çdo kohë të trajtojë me seriozitet dhe transparencë të plotë çdo situatë të çdo shtetasi.
