Më i shtrenjti në histori
Angel di Maria u bë transferi më i shtrenjtë në histori të futbollit, pasi iu bashkua Paris Saint-Germainit nga Manchester United për 63 milionë euro. Mesfushori argjentinas iu ka kushtuar klubeve ku ka luajtur plot 179 milionë euro. Pozitën e dytë e mban Zlatan Ibrahimoviç, të cilin klubet e kishin blerë në total prej 171.1 milionë eurosh. Në Top 3 gjendet Nicolas Anelka me 134 milionë
Angel di Maria u bë futbollisti më i shtrenjtë në histori të futbollit, në listën e përgjithshme të futbollistëve që kanë ndërruar disa skuadra gjatë karrierës.
Mesfushori argjentinas u largua nga Manchester Unitedi, duke iu bashkuar Paris Saint-Germainit, për 63 milionë euro, ndërsa vitin e kaluar kishte përfunduar në “Old Trafford” për afro 70 milionë euro. Me këtë rast, ish-futbollisti i Real Madridit u bë transferi më i shtrenjtë në histori të futbollit. Për të, klubet që e kanë pasur deri më tash në ekip, kanë shpenzuar plot 179 milionë euro.
Deri tash këtë epitet e mbante qe një kohë të gjatë Zlatan Ibrahimoviç, i cili iu ka kushtuar klubeve që e kishin deri më tash, Ajax, Juventus, Inter, Barcelona, Milan e Paris Saint-Germain, hiç më pak se 171.1 milionë euro.
Një tjetër futbollist, i cili nuk ishte ndonjë yll i madh i futbollit, është edhe Nicolas Anelka për të cilin klubet shpenzuan para të majme. 36-vjeçari ndërroi shumë skuadra, duke përfshirë këtu PSG-në, Arsenalin, Real Madridin, Liverpoolin, Manchester Cityn, Fenerbahçen, Boltonin, Chelsean, Shanghain, Juventusin, WBA-në dhe së fundmi Mumbai Cityn. 36-vjeçari iu kushtoi këtyre klubeve hiç më pak se 134 milionë euro. Jo shumë larg francezit gjendet argjentinasi Hernan Crespo. Ai u kishte kushtuar River Plates, Parmës, Lazios, Interit, Chelseat, Milanit dhe Genoas, 121 milionë euro. Në pesëshen e parë bën pjesë edhe bashkëkombësi i tij, Juan Sebastian Veron. 40-vjeçari luajti për Estudiantes, Boca Juniors, Sampdoria, Parma, Lazio, Manchester United, Chelsea, Inter e Brandsen. Këto klube paguan 117 milionë euro.
Gareth Bale, futbollisti më i shtrenjtë absolut në histori të futbollit, gjendet në pozitën e tetë me 100 milionë, kurse lojtari i dytë më i shtrenjtë në histori, Cristiano Ronaldo, në këtë listë gjendet në pozitën e gjashtë me 111.5 milionë. Në Top 10 bëjnë pjesë edhe yje të dikurshme të futbollit si braziliani Ronaldo, italiani Christian Vieri dhe braziliani Robinho./ZËRI
Top 10 futbollistët më të shtrenjtë në histori
1. Angel di Maria 179 milionë euro
2. Zlatan Ibrahimoviç 171.1
3. Nicolas Anelka 134.0
4. Hernan Crespo 121.0
5. Juan Veron 117.0
6. Cristiano Ronaldo 111.5
7. Ronaldo 100.9
8. Gareth Bale 100
9. Christian Vieri 87.5
10. Robinho 85
