Luis Alberto, një nga zbulimet e Igli Tares te Lazio, është “mbreti” i asisteve; askush tjetër si ai në Europë. Këtu përfshihen të gjitha “perlat” e tij, “topat llokum”, sikurse quhen në gjuhën popullore për shokët e tij të skuadrës bardhekaltër. Më saktësisht, Luiz Felipe dhe Milinkovic-Savic përfituan nga asistet nr.10 dhe 11 të spanjollit në këtë sezon. Dhe të mendosh se këto dy asiste erdhën kundër Juventusit kampion, që dominon Serie A prej 8 edicionesh radhazi. Falë tij, bardhekaltrit fituan 3-1 dhe i shkaktuan humbjen e parë sezonale “Zonjës së Vjetër”.
Por, numrat e këtij futbollisti nuk mbarojnë këtu. Luis Alberto, në vitin aktual kalendarik, bëri 15 pasime të sakta, fituese. Vetëm Cassano më 2009, Cossu më 2010 dhe Mertens më 2017 ishin në gjendje të bënin të njëjtën gjë. Shifra më interesante, pra, është ajo e asisteve të grumbulluara nga sezoni 2017-2018, që e sheh spanjollin duke udhëtuar në të njëjtën gjatësi vale me kampionin e madh Lionel Messi. Nga 30 asiste për të dy në këtë vit kalendarik, shifër që tejkalohet vetëm nga Muller (32) i Bayern Munich.
Në fronin e asistuesve europianë, duke llogaritur 5 kampionatet më të mëdha në kontinent, renditja e këtij sezoni është e tillë:
1.Luis Alberto (Lazio) – 11 asiste
2.De Bruyne (Manchester City) – 9 asiste
3.Thomas Muller (Bayern Munich) – 9 asiste
4.Son (Tottenham) – 7 asiste
5.Jadon Sancho (Borussia Dortmund) – 7 asiste
