Qendra e Zhvillimit dhe Turizmit në Vermosh është një prej shumë mrekullive të Alpeve që sjellim para jush. Rruga ishte mjaft cilësore, një rrugë moderne që i plotëson të gjitha kushtet, e përveç rrugës janë ngritur dhe shumë ballkone panoramike, objekte atraksioni natyrore dhe në fund si qershia mbi tokë, është kjo qendër e cila do të përpiqet që të promovojë vlerat e zonës së Kelmendit.
Aq fantastike është kjo zonë sa në Vermosh qëlluam edhe me kryeminsitrin Edi Rama i cili kishte ardhur për ta vizituar.
Edi Rama: Po sot kishim lënë që të vinim këtu edhe të respektonim dhe nderonim këta katër djem të zonës, që pas një periudhe në emigracion janë kthyer, kanë vendosur të investojnë këtu eksperiencën, vullnetin, edhe kursimet e tyre. Dhe kanë bërë këtë mrekulli që është një shembull, shumë kuptimplotë, i asaj që vjen, i asaj që ne presim dhe për të cilën jemi përpjekur jo pak, në këto vite, lidhur me këtë zonë fantastike këtu, në mes të maleve të Vermoshit.
Rudina Xhunga: E di çfarë thonë? “Kur na nxori kryeministri në Instagram, na vërshuan kërkesat për të ardhur këtu. Në fakt kjo është private,”, thonë: “E kemi për vete!”
Edi Rama: Sigurisht që kjo është private, por siç janë private dhe shumë struktura të tilla edhe në Austri në Zvicër. Në kohën kur familja nuk e shfrytëzon për vete, ajo vihet në dispozicion të turistëve. Patjetër që do të jetë një atraksion shumë i madh këtu dhe patjetër që do të nxisë edhe të tjerët. Jam i bindur që edhe këta vetë do të nxiten të shkojnë më tutje sepse, nuk diskutohet që kërkesat do të jenë të jashtëzakonshme në periudhën, sidomos pas pandemisë.
Rudina Xhunga: Po vini në Vermosh, pas Valbonës. Mua të paktën më duket sikur veriu ka turizëm më të zhvilluar, sesa jugu, ose më të rregulluar.
Edi Rama: Jo nuk e ka më të zhvilluar se jugu, e ka më pak se jugu. Ose sesa bregdeti që të jemi të saktë, sepse faktikisht nga Velipoja deri poshtë në Sarandë, zhvillohet turizmi bregdetar. Por me infrastrukturën që ne kemi ndërtuar, edhe me disa punë të tjera që janë bashkëngjitur një programi që është i ndërtuar për të qenë nxitës dhe për të tërhequr vëmendjen, po ndodh një transformim që tani nuk ndalet më dhe që sigurisht këtë dekadë do ta bëjë turizmin malor, një turizëm shumë, shumë të njohur dhe burim të rëndësishëm të ardhurash për të gjithë këtë zonë që ka vuajtur shumë nga izolimi, ka vuajtur shumë nga braktisja, ka vuajtur shumë nga mungesa e infrastrukturës. Unë isha në Valbonë, atje kemi ndërtuar një qendër të re turistike. Tani do të shkoj të shoh edhe pikën e re këtu, qendrën e re turistike të Vermoshit që është ndërtuar me financimet tona, nga Fondi Shqiptar i Zhvillimit. Pikërisht për të krijuar qendra graviteti, për të krijuar pika tërheqëse dhe nxitëse. Dhe faktikisht ndryshimi është i dukshëm. Shihet edhe rrugës që ka projekte që po zhvillohen që do të thotë që instinkti i sipërmarrjes ose i atyre që i hedhin kursimet e tyre nga emigracioni nuk gabon dot. Asnjëherë nuk ka gabuar.
Rudina Xhunga: Uroj që turizmi ta shpëtojë këtë vend.
Edi Rama: Ky vend është i shpëtuar Rudina, por sigurisht që turizmi do ta ndihmojë shumë që të kalojë në një nivel tjetër. Këtu nuk bëhet fjalë për të shpëtuar, këtu bëhet fjalë për të kaluar në një nivel tjetër.
/a.r
