Ngritja e organeve të reja të drejtësisë, e sidomos SPAK dhe BKH, pritet të shënojnë një pikë kthese në historinë e sistemit të drejtësisë shqiptare.
Shumë çështje të mbyllura dhe të pagjykuara mirë, për shkak të ndërhyrjes së politikës në vendimet e gjykatave, pritet të rihapen me shpresën se gjyqësori do të ndahet një herë e përgjithmonë nga politika dhe të japë vendime të drejta në përputhje me ligjet e vendit.
Një nga çështjet më skandaloze me një vendim qesharak nga gjykata, është “21 Janari”.
Sot mbushen 9 vjet nga ngjarja e 21 Janarit, ku u bënë “kurban” katër të pafajshëm për të kënaqur orekset e qeverisë së asaj kohe, ndërkohë që kjo çështje ka mbetur e pagjykuar mirë dhe fajtorët kryesorë i kanë shpëtuar drejtësisë deri më sot.
Por në lidhje me këtë ngjarje, dje ka reaguar edhe zv/ministri i Mbrojtjes, Petro Koçi. Ky i fundit gjatë një prononcimi për gazetën “SOT”, e etiketoi tragjedinë e “21 Janarit” si një ditë ku dhuna triumfoi mbi protestuesit paqësorë, ndërsa akuzoi ish-kryeministrin Sali Berisha se është përgjegjësi kryesor i kësaj masakre.
Sipas tij, shteti i asaj kohe përdori pushkën dhe plumbat për të mbrojtur interesat e tij. “21 Janari është turpi i politikës dhe drejtësisë shqiptare. Është dita e dhunës së armatosur mbi demonstruesit paqësorë. Është dita e plumbave mbi lirinë, mbi demokracinë.
21 Janari dëshmon sesi shteti përdoret si pushkë për interesa private politike dhe sesi kanuni është ngulitur në mendësinë e disa politikanëve që fatkeqësisht kanë drejtuar vendin për shumë vite”, deklaroi ai.
Ndërkohë, zoti Koçi i bëri thirrje SPAK-ut që të hetojë ngjarjen e “21 janarit”, duke çuar përpara drejtësisë personat që dhanë urdhër për të qëlluar mbi protestuesit paqësorë.
Sipas tij, katër viktimat e 21 Janarit mund të shpallen Dëshmorë të Atdheut. “Në 21 Janar 2011 u vranë 4 të pafajshëm, të cilët tashmë me ligjin e ri mund të shpallen dëshmorë të atdheut. SPAK e ka për detyrë ta shlyejë këtë turp të Shqipërisë, duke ndëshkuar fajtorët urdhërdhënës. Ata që haptazi u përpoqën të fshijnë gjurmët e krimit publik.
Dëgjoj përfaqësues të PD që ulërijnë për vjedhje votash, duke interpretuar përgjime të përzgjedhura e të diskutueshme. Për luftë politike mund të thotë dikush.
Po a ka moral të pretendosh për drejtësi për krime të pretenduara e të “sofistikuara”, kur ti nuk guxon të kërkosh drejtësi për krime të ndodhura në sy të gjithë popullit?! Krimet publike të hetohen dhe të ndëshkohen të parat”, nënvizoi zv.ministri Petro Koçi, shkruan “Tema”. /e.s/
