PS mbyll sot fushatën elektorale, që pasohet nga 24 orë heshtje zgjedhore.
Në fjalën e tij Rama u shpreh se më 11 maj PS do të marrë shumicën më të madhe të arritur ndonjëherë.
“Një pyetje kam, e keni seriozisht që doni të dëgjoni një fjalim timin tani? Tiranë e dashur, Shqipëri e shtrenjtë, vëllezër e motra socialistë.
E nxorëm nga gërmadhat e viteve 90 e më pas e rilindëm. Ju jam mirënjohës nga zemra për praninë tuaj në këtë fushë dhe u rikthyem këtu, e gjithë skuadra e Tiranës tonë jo thjesht në takimin përmbyllës, por në kulmin e një tjetër rrugëtimi 4 vjecar, drejt majës ku ndodhet Shqipëria e Evropës së bashkua. Nuk besoj te rastësitë, nuk ka rastësi që ne jemi këtu në 9 maj në ditrën e evropës për të thënë fjalën e fundit të këtij rrugëtimi dhe për të shkuar së bashku me shumicën më të madhe ndonjëherë të shqiptarëve për të firmosur marrëveshjen evropiane, për Shqipërinë në BE”, tha ai.
Në prani të ministrave, kandidatëve dhe mbështetësve të shumtë, Rama kujtoi sfidat e së kaluarës dhe hodhi akuza të ashpra ndaj kundërshtarëve politikë.
“Ne socialistët ishim shembur përtokë, rruga jonë për të fituar zemrat e Shqipërisë nisi nga një mjegull e ftohtë e një disfate të rëndë… por karakteri i pathyeshëm na ngjiti përsëri.”
Kreu i qeverisë u ndal veçanërisht te transformimi i Tiranës dhe beteja për kryeqytetin, duke theksuar se humbja e përkohshme ishte “sprova e fundit para ngjitjes së pandalshme të PS”.
Rama u shpreh me siguri për një tjetër fitore historike më 11 maj:
“Ne e rimorëm qendrën e politikës shqiptare dhe do të qëndrojmë aty pas kësaj fitoreje. Kundërshtarët tanë nuk kanë për të kuptuar kurrë se nuk na mundin dot, sepse nuk e kuptojnë pse i mundim çdo herë e më thellë.”
Me ironinë e zakonshme, ai hodhi poshtë figurat e reja të opozitës:
“Ata që me demek janë prurje të reja nuk ngjajnë me ne, ngjajnë me kundërshtarët tanë të kahershëm – dava humbësash!”
