Një anije është mbytur në brigjet e Jemenit, duke lënë të vdekur 68 emigrantë afrikanë dhe 74 të tjerë të zhdukur.
Agjencia e migracionit e OKB-së bëri me dije se anija me rreth 150 emigrantë etiopianë në bord u mbyt në Gjirin e Adenit pranë provincës jugore jemenase të Abjanit. 12 persona arritën të mbijetojnë.
Ky incident është pjesë e një serie tragjedish me anije në këtë rajon, që ka marrë jetën e qindra emigrantëve, të cilët ikin nga konflikti dhe varfëria në Afrikë drejt vendeve më të pasura të Gjirit Arab.
Drejtoria e sigurisë në Abjan bëri me dije se ka nisur operacioni i kërkim-shpëtimit duke pasur parasysh numrin e madh të emigrantëve të vdekur dhe të zhdukur.
Pavarësisht më shumë se një dekade lufte civile, Jemeni është një rrugë kryesore për njerëzit nga Afrika Lindore dhe Briri i Afrikës që përpiqen të arrijnë në vendet arabe të Gjirit për punë. Emigrantët merren nga kontrabandistët në anije shpesh të rrezikshme dhe të mbipopulluara përmes Detit të Kuq ose Gjirit të Adenit.
Qindra persona kanë humbur jetën ose janë zhdukur në përmbytjet e anijeve pranë Jemenit në muajt e fundit. Në muajin mars kujtojmë se dy persona humbën jetën dhe 186 të tjerë rezultojnë të zhdukur pasi katër anije u përmbysën pranë Jemenit dhe Xhibutit, sipas IOM-it.
Më shumë se 60.000 emigrantë mbërritën në Jemen në vitin 2024, nga 97.200 në vitin 2023, ndoshta për shkak të patrullimit më të madh të ujërave, sipas një raporti të IOM-it në mars.
