Komisioni Qendror i Zgjedhjeve është i gatshëm të shpallë rezultatin përfundimtar të zgjedhjeve të parakohshme parlamentare të 28 dhjetorit, pasi është përmbyllur plotësisht procesi i numërimit të votave. Grupi i fundit i fletëvotimeve që u numëruan ishin ato me postë, ndërsa procesi përfundoi rreth orës 02:00 të mëngjesit të së premtes.
“Sipas Ligjit për zgjedhjet e përgjithshme, palët mund të parashtrojnë ndonjë ankesë në Panelin Zgjedhor për Ankesa dhe Parashtresa lidhur me administrimin e numërimit në Qendrën e Numërimit dhe Rezultateve brenda 48 orëve nga ndodhja e shkeljes së supozuar”- theksoi zëdhënësi i KQZ-së Valmir Elezi.
Pikërisht për votat me postë, në Panelin Zgjedhor për Ankesa dhe Parashtresa PDK ka depozituar një ankesë, ku ka kërkuar shufqizimin e mijëra votave të diasporës që kanë ardhur nga diaspora e Kosovës.
Në zgjedhjet e parakohshme parlamentare të 28 dhjetorit, Lëvizja Vetëvendosje mori 51.11 për qind të votave dhe do të ketë 57 vende në Kuvendin e Kosovës, PDK mori 20.19 për qind dhe numri i votave përkthehet në 22 mandate deputetësh, LDK me 13.23 për qind do të ketë 15 mandate dhe AAK që u mbështet nga 5.5 për qind e votuesve do të përfaqësohet në Kuvend me 6 deputetë.
Ndërkaq, partitë minoritare i kanë 20 vende të garantuara në Kuvendin e Kosovës. Zgjedhjet e 28 dhjetorit ishin të katërtat që u mbajtën brenda vitit 2025 në Kosovë dhe të dytat për Kuvendin.
