Në orët e fundit të merkatos së janarit, skuadrat shqiptare kanë zyrtarizuar dhe përforcimet e fundit.
Kukësi prezantoi afrimin e fundit në skuadër. Bëhet fjalë për mesfushorin Atdhe Rashiti, i cili është zyrtarisht lojtari më i ri i verilindorëeve. Ka qenë vetë faqja zyrtare e klubit, e cila me anë të një njoftimi prezantoi afrimin e ri dhe, siç bëhet me dije, ai ka firmosur një kontratë që do ta mbajë të lidhur me verilindorët deri në qershor të vitit 2026. 23-vjeçari, i lindur në Francë, vjen te Kukësi nga kampionati zviceran, teksa është një futbollist i dalë nga akademia e Baselit. Rashiti ka luajtur edhe me ekipe si Deportivo Alaves e Inter de Madrid në Spanjë dhe BlackStar në Zvicër.
Rashiti ka zhvilluar edhe një ndeshje me Shqipërinë U21.
Ndërkohë, Erzeni ashtu siç po zhvillon një kampionat surprizë, ashtu ka bërë dhe një goditje suprizë në ditën e fundit të merkatos së dimrit. Së fundmi, ekipi shijakas ka afruar ish-lojtarin e Partizanit, Romero. Pas prishjes së marrëveshjes me të kuqtë, mesfushori doli një lojtar i lirë dhe menjëherë drejtuesit e Erzenit u vunë në lëvizje për ta sjellë në Shijak. Siç bëhet me dije, shumë shpejt lojtari nga Venezuela pritet të vihet në dispozicion të teknikut Xhevahir Kapllani.
Ndërkohë, drejtuesit nuk kanë pranuar asnjë nga ofertat zyrtare për brazilianin Patrik Nonate, duke e konfirmuar si liderin e sulmit dhe për pjesën e mbetur të sezonit.
Ndërsa në kryeqytet një lajm i keq ka ardhur për bardheblutë pak minuta para përfundimit të merkatos. Kristal Abazaj, afrimi i bujshëm i këtij janari tek bardheblutë, do të mungojë për më shumë se 1 muaj për shkak të një goditjeje në menisk. Menjëherë, 26-vjeçari ka udhëtuar në Kroaci për të marrë aty mjekim më të specializuar.
/a.r
