Siti më popullor i torrenteve në botë, KickassTorrents, është mbyllur, teksa policia polake ka arrestuar themeluesin dhe drejtuesin e tij, Artem Vaulin, me kërkesë të FBI-së.
Vaulin, 30 vjeç, nga Harkovi i Ukrainës, e hapi faqen e tij të torrenteve më 2008 dhe ia arriti të siguronte audiencë në të gjithë botën. Në faqen e KickassTorrents, e cila ka ndryshuar disa herë adresë në vitet e fundit për të shmangur problemet legale me të drejtat e autorit, mund të gjeje miliona torrente për shkarkimin e artikujve të ndryshëm, filma, seriale, muzikë, videogame, software e të tjera.
Ndaj Vaulin janë ngritur dy akuza nga Departamenti i Drejtësisë në SHBA, dhunim i të drejtës së autorit dhe pastrim parash.
“Vaulin akuzohet për menaxhimin e sitit më të vizituar ilegal në botë për shpërndarjen e materialeve në internet, përgjegjës për shpërndarjen e materialeve me të drejtë autori me vlerë mbi 1 miliardë dollarë”, thotë ndihmësprokurori i përgjithshëm i SHBA, Caldwell.
Ndonëse është arrestuar në Poloni, Vaulin akuzohet nga SHBA për shkak se një nga serverat e KAT gjendet në Çikago.
javanews/d.i.
