Në Graçanicë sivjet do të mbahet Festivali i parë ndërkombëtar i arteve mesjetare dhe artizanatit. Ky aktivitet është mbështetur nga USAID dhe Kuvendi Komunal i Graçanicës
Ishte viti i largët 1389 kur në afërsi të Gazimestanit ishte zhvilluar beteja e përgjakshme e njohur si “Beteja e Kosovës” ndërmjet forcave ballkanike dhe ushtrisë osmane. Kjo luftë për serbët kujtohet si beteja e lavdisë mbi të cilën janë thurur mite të ndryshme.
Ata e konsiderojnë këtë betejë si triumf, përkundër që forcat osmane të Sulltan Muratit kishin mposhtur aleancën ballkanike.
Kjo betejë ka shërbyer si motiv për realizimin e një video promocioni që paralajmëron një nismë të veçantë që është ndërmarr në këtë komunë për ta rikujtuar periudhën mesjetare.
“Shield” (Mburoja) është emërtuar festivali që organizohet sivjet për herë të parë dhe që ka për synim shpalosjen e arteve mesjetare dhe të artizanatit.
Kjo ngjarje ka karakter ndërkombëtar dhe deri më tani pjesëmarrjen e kanë konfirmuar ekipe nga Bullgaria, Kroacia, Sllovenia, Hungaria dhe Serbia.
Organizatorët paralajmërojnë se kjo është një ngjarje unikate kulturore, historike dhe sportive në rajon pasi ngëthen në vete garanë kategori të ndryshme si atë të gjuajtjes me hark, betejës së kalorësve dhe të hedhjes së gurit e shtizës, shkruan KultPlus.
Përveç pjesës konkurruese të festivalit, orari përmban ngjarje të tjera, të tilla si: ceremonia e pjesëmarrjës në paradë nëpër Graçanicë, punëtoritë interaktive, ekspozita fotografike, koncerte të muzikës mesjetare dhe orarin për fëmijët.
Mysafirët do të kenë mundësinë të ecin nëpër kampet e kalorësve mesjetarë brenda zonës së ekspozitës, të veshin pjesë të pajisjeve të kalorësve, si dhe të blejnë suvenire lokale, shijojnë ushqim tradicional, raki dhe verë vendëse.
Kjo ngjarje unikate do të mbahet prej 16 deri më 18 shtator në stadiumin e futbollit brenda kompleksit sportiv Dragan Xhajic.
Me përkrahjen e shoqatës nga Beogradi “Shqiponjat e Bardha”, për ruajtjen e zanateve dhe aftësive tradicionale, Festivali “Mburoja” është përfshirë në hartën e Betejave Historike Mesjetare – Kampionatin Botëror, të quajtura si “Beteja të Kombeve”.
Sipas organizatorëve ky hap është jashtëzakonisht i rëndësishëm për promovimin botëror të Festivalit “Mburoja” dhe qytetit të Graçanicës si destinacion turistik.
Festivali organizohet nga shoqata turistike e Graçanicës me mbështetje financiare nga USAID-i (Programi për Zhvillim i Shteteve të Bashkuara) dhe komuna e Graçanicës. Organizatorët parashikojnë që ky festival do të bëhet një ikonë e Graçanicës dhe arsye shtesë për turistët që ta vizitojnë këtë vend, përgatiti “KultPlus.com”. (b.an)
