Shtetet e dështuara, zonat e konfliktit dhe ndasitë fetare janë terrene pjellore për terrorizmin. Ky ka qenë thelbi i fjalimit të Mbretit Abdullah të Jordanisë, në Konferencën për Sigurinë që po mbahet në Mynih, ku monarku jordanez është ndalur edhe te Ballkani dhe sfida, që ai po paraqet.
Ndërsa flet për rreziqet që paraqet grupi i Shtetit Islamik, të cilit ai i referohet me termin “Daesh”, Mbreti Abdullah thekson se mundja e tij në Siri dhe Irak është interes strategjik dhe i përbashkët.
Terrorizmi, të cilin ai e quan një kancer, ka nxitur dhunën dhe mungesën e humanizmit në kufij, ndërsa po josh individë në të gjithë botën. Sidoqoftë nuk mjafton fokusimi vetëm te “Daeshi” në Siri apo Irak, ndërkohë që të tjera grupe terroriste forcohen në Afrikë dhe Azi.
Është koha për një nivel të ri global veprimi, – thotë Mbreti Abdullah. – Dhe të gjitha vendet duhet të punojnë bashkë, si një aleancë e vërtetë globale.
“Ne, si arabë dhe myslimanë, kemi përgjegjësinë dhe detyrën të jemi në krye të kësaj lufte, në krye të betejës kundër Islamit të jashtëligjshëm. Kjo është një luftë për të mbrojtur besimin, vlerat dhe të ardhmen tonë”, tha ai. E duke u ndalur tek Europa, Mbreti Abdullah thotë se është thelbësore të mos injorohet sfida që paraqet Ballkani.
Vendet me shumicë myslimane në Ballkan meritojnë mbështetjen tonë, në mënyrë që të parandalohet kërcënimi i terrorizmit. Këto vende janë vija kryesore e frontit në luftën kundër ekstremizmit, teksa janë gjithashtu linja e parë e mbrojtjes. Asgjë nuk mund të jetë më e kushtueshme për Europën, sesa rritja e destabilitetit dhe ekstremizmit në Ballkan.
Ndaj është thelbësore të goditen ekstremistët në të gjitha anët, që kërkojnë të mbjellin ndasi në këtë pjesë të Europës. Sipas mbretit jordanez, sfida më e madhe sot është aftësia e disa eksponentëve, që të veshur me petkat e Islamit përfitojnë për të avancuar axhenda politike në Ballkan, që nuk janë në interes të Europës.
Kjo është diçka, që të gjithë së bashku duhet ta parandalojmë – thotë Mbreti Abdullah, i cili në vijim bën apel për të drejtuar sytë nga vende si Bosnje-Hercegovina, Shqipëria dhe Kosova. Sipas tij, këto vende dhe të tjera në rajonin e Ballkanit, duhet të jenë pjesë integrale e arkitekturës së Europës dhe shtylla të sigurisë dhe prosperitetit.
“Afrojini këto vende më pranë jush, si modele të bashkëjetesës, moderimit dhe tolerancës, në mënyrë që ato të bëhen linja e parë e stabilitetit të Europës. Nëse nuk veprojmë tani, rreziqet vetëm do të rriten; nëse nuk veprojmë të bashkuar, do të humbasim mundësitë për sukses”, përfundoi ai. TCh
