Është mbledhur për herë të parë këtë të hënë komisioni për reformën zgjedhore, i kryesuar nga Kryetari kuvendit Ilir Meta, i cili tha se rezultatet e punës së këtij komisioni do duhet të përfundojnë brenda këtij sesioni parlamentar. Meta u shpreh gjithashtu për nevojën e konsensusit mes palëve, duke u bazuar në rekomandimet e OSBE-ODIHR.
“Mendoj që ndryshimet të realizohet përpara mbylljes së këtij sesioni parlamentar. Kam besim të plotë që ky komision do të punojë me përgjegjshmëri dhe frymë gjithëpërfshirëse, pavarësisht dallimeve… sepse ne kemi një referëncë të përbashkët, janë raportet e OSBE-ODIHR-it.”- theksoi Meta.
Nga ana tjetër, përfaqësuesi i të djathtëve në komision, deputeti Oerd Bylykbashi e vuri theksin tek nevoja për të zbatuar dekriminalizimin si dhe tek konsensusi mes palëve, përndryshe tha ai, zgjedhjet e ardhshme do të vihen në rrezik.
“Duhet konsensus dhe vullnet politik. Suksesi i procesit të dekriminalizimit lidhet me suksesin e Reformës Zgjedhore. Shqipëria ka bërë hapa prapa në lirinë e zgjedhjeve. Blerja e votës dhe presionet ndaj zgjedhësve janë fenomene shumë të rënda. Duhet vullnet për t’i luftuar këto fenomene. Financimi politik po ndikohet fuqimisht nga paraja e pisët, nga lekët e korrupsionit. Nëse ne nuk do të punojmë me konsensus, me objektivin për të përcaktuar qartë reformën, zgjedhjet e ardhshme do të jenë të cënuara.”- tha Bylykbashi.
Bashkim Fino i Partisë Socialiste deklaroi: “Do të marrim në konsideratë raportin e OSBE/ODIHR-it. Kemi kohë dhe le të shpresojmë që të mbarojmë punë para pushimeve, por konsensusi mund të arrihet edhe në fund të vitit për Kodin Zgjedhor”.
Komisioni përbëhet nga 10 anëtarë, 5 nga mazhoranca dhe 5 nga opozita, si dhe nga dy bashkëkryetarë, Bashkim Fino nga PS dhe Oerd Bylykbashi nga PD.
