Ministria e Mjedisit ka nisur Fushatën Kombëtare të Pyllëzimit, duke u ndalur këtë radhë në Përmet. Nëpërmjet programit Gjelbërimi i mjediseve publike të Përmetit, do të mbillen 2 mijë fidanë dru shkurre dhe lule dekorative, ku në mes tyre do të mbillen 1000 rrënjë trëndafila, për t’i dhënë emrin Përmetit si “ Qyteti Trëndafilave”.
Ministri Koka teksa inspektoi nga afër punimet e bashkisë së Përmetit për gjelbërimin e qytetit, mbolli simbolikisht fidanin e parë të këtij projekti. Ministri Koka vlerësoi bashkëpunimin e fortë me kryebashkiakun e Përmetit, kryesisht për trajtimin e mbetjeve apo menaxhimin e pyjeve, dy sektorë të rëndësishëm për shëndetin e qytetarëve.
Edhe pse kryebashkiaku i Përmetit i përket forcës politike të djathë, kjo nuk e ka penguar aspak bashkëpunimin e frytshëm me Ministrinë e Mjedisit. Ministri Koka shprehu mirënjohje për Kryetarin e Bashkisë së Përmetit, duke e cilësuar si modelin më të mirë të bashkëpunimit të pushtetit vendor me atë qendror.
Në vijim të prononcimit të tij ministri tha se duhet të zhvillohet më shumë turizmi në këtë qytet. Ministria e mjedisit ka planifikuar një fond prej 10 milionë lekësh të reja, për gjelbërimin dhe pyllëzimin Kombëtar. Fushata Kombëtare e pyllëzimit, u çel një ditë më parë në Ersekë dhe do të vijojë me qytete të ndryshme të Shqipërisë.
ma.me
