Ekspertët kriminalistë kanë mbërritur në vendin e ngjarjes pas atentatit të mbrëmshëm në një nga lokalet më të njohura e të frekuentuara në Bllok ku mbeti i vrarë një person dhe u plagosën tre të tjerë.
Mësohet se ekspertët do të bëjnë këqyrjen e skenës së krimit në dritë natyrale për të mbledhur prova shkencore si gjurmë gjaku, shenja gishtash, flokë etj.
Përfshirja e disa personave në krim e bën më të vështirë zbulimin dhe rindërtimin e ngjarjes por pritet që për këtë të ndihmojnë edhe pamjet e kamerave të sigurisë.
Në pamje është fiksuar momenti kur dy grupet rivale futen në lokal dhe brenda pak sekondave aty nis përleshja fillimisht fizike dhe më pas edhe me armë zjarri.
I pari që hap zjarr është truproja i Ervis Martinajt, Rigers Gaxha, i cili mbeti viktimë e kësaj ngjarje.
Dy grupet janë konfliktuar me grushte me njëri-tjetrin dhe në sherr e sipër Rigers Gaxha, duke i dalë në mbrojtje Ervis Martinajt, qëllon me armë zjarri në drejtim të grupit rival. Kundërpërgjigja rezulton fatale për Gaxhën i cili merr një plumb në kokë, ndërsa Ervis Martinaj dhe Laert Hasa, të cilët kanë qenë në një tavolinë sëbashku mbesin të plagosur.
Numri i të shoqëruarve është tejet i lartë, më shumë se 50 persona që mund të kenë dijeni për ngjarjen. Numri më i madh i të shoqëruarve ndonjëherë kohët e fundit në ngjarje të tilla
Nga atentati mbetën të plagosur Ervis Martinaj, Laert Hasa dhe një i tretë, ende i paidentifikuar.
/b.d
