“Rreth 50 % e urave në vendin tonë paraqesin probleme”, deklaroi sot zëvendësministri i Infrastrukturës dhe Energjisë, Artan Shkreli.
Gjatë tryezës së zhvilluar për sigurinë e urave në vend me drejtues të ministrisë së Infrastrukturës dhe Energjisë dhe Autoritetit Rrugor Shqiptar, Shkrelit theksoi se më problematike paraqiten në zonën veriore të vendit.
Sipas tij, humbja e disa urave ka ardhur si pasojë e amortizimit në kohë dhe mungesa e mirëmbajtjes sipas standardeve të përcaktuara.
“Në Shqipëri rreth 70% e urave e kanë kaluar moshën 50-70 vjet që do të thotë që do të thotë se kanë hyrë në fazën e tyre të rriskut. Deri tani mirëmbajtja e urave ka qenë një mirëmbajtje rutinë, që do të thotë më tepër pastrim, riparim i parmakëve dhe ndonjë mbushje nga erozioni që ka shkaktuar të këmbët e rave, por asnjëherë në nivel strukturor që do të thotë ndërhyrje në elementë konstruktivë të urës përjashto rastet kur ka qenë shumë evidente rreziku i shëmbjes”, tha Shkreli.
“Grupi i punës pas një kqyrje të shpejtë që ka bërë ka arritur në përfundimin jo shumë pozitive see mbi 50% e urave në vendin tonë paraqesin probleme, pjesa më e madhe e të cilave në veri si rezultat edhe i kushteve atmosferike dhe trafikut dhe një pjesë pak më e vogël në jug”, deklaroi zv.ministri.
Ai solli në vëmendje një inspektim të ministres Balluku dhe drejtoreshës së ARRSH-së, Qato në një nga urat e Rrogozhinës dhe duke u nisur nga indikacionet e ekspertëve, bënë bllokimin e saj që është një aks nacional duke shmangur kështu një tragjedi që për fat të mirë u paralajmërua.
Shkreli shtoi se censusi që kemi bërë nuk përcakton vetëm katalogimin e urave në Shqipëri i cili dihej në mënyrë të përafërt, ndërsa tani kemi një numër shumë preciz të urave në akset kombëtare por ka nxjerrë në pah edhe urat që janë në rrezik imediat për shembje.
“Çdo urë do të ketë kartelën e vet teknike jo vetëm gjendje aktuale por edhe historikun e ndërhyrjeve dhe çfarë patologjish që paraqet ura”, tha Shkreli.
“Urat në këtë moment katalogohen, do të jenë online dhe do të kenë emërtesat e tyre dhe do të përcaktohet një algoritëm i amortizimit të urave, ku përcaktohet vjetërimi i urës dhe kapaciteti i saj”, theksoi zv.ministri.
/a.rada
