Një euro e paqëndrueshme nuk i ka penguar as pagesat me shuma të mëdha në këtë valutë. Transaksionet në euro të kryera për vitin 2024 kanë shënuar vlerën më të lartë ndër vite.
Sipas të dhënave të Bankës së Shqipërisë, sistemi ndërbankar i pagesave me vlerë të madhe, AIPS i cili u mundëson si individëve, por edhe bizneseve transfertat dhe pagesat me komisione të ulëta, regjistroi 291 mijë e 67 transaksione në periudhën janar-nëntor 2024.
Teksa janë një indikacion edhe për nivelin e lartë të përdorimit të Euros në transaksionet e brendshme ekonomike, pagesat në euro nga AIPS arritën vlerën e 4.6 miliardë eurove.
Në 2023 Banka e Shqipërisë raporton se për të njëjtën periudhë numri i transaksioneve të kryera për pagesat në euro brenda vendit ishte 249 mijë me vlerë 4.1 miliardë euro.
Një tregues kryesor i rritjes së përdorimit të këtyre pagesave janë edhe blerjet që individët apo bizneset kryejnë në shuma të mëdha, pronat, automjetet, apo dhe lëvizjet ndërmjet bankave.
Pavarësisht se për një transfertë prej 100 mijë eurosh bizneset paguajnë më pak se 50 euro komision, ndërsa në pagesat më të vogla se 10 mijë euro komisioni është deri në 6 euro, pasiguritë nga kursi i këmbimit ndër vite i kanë stepur individët dhe bizneset.
