Dhe pse muajit gusht po i vjen fundi, radhët e gjata të shqiptarëve të Kosovës që udhëtojnë drejt Shqipërisë përmes Rrugës së Kombit vazhdojnë. Edhe këtë fundjavë pati radhë të gjata. Një nga shkaqet që krijohen radhë janë urat e papërfunduara në segmentim Morin-Kukës të Rrugës së Kombit.
Por edhe hyrja e urës mbi Drin është shkaktar kryesor i radhëve të gjata. Automjetet duhet të kalojnë nga dy në një korsi të vetme. Policia rrugore këto ditë të fundit të muajit gusht po menaxhon situatën. Një pjesë e mjeteve kërkonin rrugë alternative dhe kanë hyrë në qytet, por Kukësi ka vetëm një dalje, Ura e Drinit të Zi, e cila nuk e përballon këtë fluks.
Në projekt është ndërtimi i urës së madhe mbi Drin. Madje punimet për ndërtimin e saj duhej të kishin nisur me kohë, bashkë me dublimin e urave të tjera deri në Morinë, përfshirë mbikalimet dhe nënkalimet. Vetëm këtë fundjavë në Pikën Kufitare të Morinës kanë kaluar rreth 40 mijë shqiptarë nga Kosova, 100 autobusë si dhe rreth 8500 autovetura.
a.ç
