Mbi 4 mijë kuota bosh vetëm në Universitetin e Tiranës, kriteret e pranimit

Në Universitetin e Tiranës pjesa dërrmuese e kuotave të pranimit nuk janë plotësuar dhe janë në dispozicion të kandidatëve në këtë fazë të dytë. Sipas të dhënave zyrtare të rektoratit të UT-së, nga 5.378 kuota pranimi janë regjistruar vetëm 1.297 studentë, ndërsa 4.081 kuota janë bosh. Pra maturantët e fazës së parë kanë zënë vetëm 24% të kuotave në këtë universitet, ndërsa pjesa tjetër, 76% e tyre janë të lira. Procedurat e pranimit në UT edhe në këtë raund nuk ndryshojnë, pra janë të njëjtat kritere aplikimi: 50% të peshës në formulën e pranimit e ka nota mesatare e shkollës së mesme, për të gjitha vitet, përfshirë dhe provimet e Maturës Shtetërore, ndërkohë që 50% do e ketë nota mesatare e gruplëndëve të përcaktuara si prioritare nga fakultetet përkatëse.
FAKULTETI I DREJTESISE
Më shumë regjistrime ka pasur Fakulteti i Drejtësisë, duke shkuar në rreth 60% numri i të regjistruarve, pasi nga 660 kuota, janë regjistruar 394 studentë, duke lënë vetëm 266 kuota bosh. Maturantët që do të aplikojnë në këtë fakultet për kuotat bosh, 50% të pikëve i marrin nga mesatarja e tri viteve të shkollës së mesme, plus mesataren e notave të provimeve të Maturës Shtetërore. Ndërkohë që, 50% do e ketë nota mesatare e gruplëndëve të përcaktuara si prioritare nga ky fakultet, të cilat janë: Histori, Qytetari, Gjuhë Shqipe dhe Letërsi, Ekonomi, dhe lëndë me zgjedhje janë: Sociologji, Psikologji dhe Filozofi.
FAKULTETI I EKONOMISE
Në Fakultetin e Ekonomisë, nga 1.178 kuota pranimi janë regjistruar 248 fitues, duke lënë 930 kuota bosh. Në këtë fakultet, maturantët që do të aplikojnë duhet të shikojnë lëndët preferenciale, të cilat janë katër: Ekonomia, Matematika, Fizika dhe Gjuha e Huaj. Në secilin program studimi, Ekonomia dhe Matematika kanë secila nga 15% të peshës, ndërsa dy lëndët e tjera nga 10%. Pra maturantët që mesataret e këtyre lëndëve për të tria vitet e studimit i kanë të larta, kanë më shumë shanse të fitojnë të drejtën e studimit.
HISTORI-FILOLOGJIA
Ky fakultet për fazën e dytë të aplikimeve, e cila nis në 23 shtator 2016, ka 452 kuota bosh, pasi nga 630 vende, janë regjistruar vetëm 178 studentë. Në programet e studimit të këtij fakulteti grupi i lëndëve preferenciale është 10, dhe secila prej tyre ka nga 5% të peshës, 50% që është totali. Grupi i lëndëve preferenciale është: Gjuhë Shqipe dhe Letërsi; Histori; Gjeografi; Sociologji; Filozofi; Psikologji; Qytetari; Gjuhë e huaj; Histori Arti dhe Histori Muzike.
GJUHET E HUAJA
Te Gjuhët e Huaja janë 658 vende të lira, sepse u regjistruan 172 studentë, ndërkohë që për këtë vit akademik janë miratuar 830 kuota pranimi. Grupi i lëndëve preferenciale të këtij fakulteti janë 5, dhe secila ka nga 10% të peshës: Gjuhë e huaj e parë, Gjuhë Shqipe dhe Letërsi; Qytetari; Arte; Gjuhë e huaj e dytë/karriere, aftësimi për jetën. Nëse një kandidat që aplikon nuk ka kryer lëndën Qytetari, ai do të hyjë me 10% të pikëve më pak se një kandidat që i ka të gjitha lëndët preferenciale.
SHKENCAT E NATYRES
Në Fakultetin e Shkencave të Natyrës janë regjistruar vetëm 13% e studentëve; nga 1.258 kuota pranimi, u regjistruan 168 fitues, duke lënë 1.090 kuota të paplotësuara. Në këtë fakultet janë nga 4 lëndë preferenciale, por të ndryshme, në varësi të programit të studimit. Dega Informatikë ka përcaktuar si lëndë prioritare: Informatikë 20%, Matematikë 20%; Fizikë 5% dhe Biologji 5%. Kjo do të thotë se, për të rritur shansin e pranimit në këtë degë, ju duhet të keni nota të larta në këto 4 lëndë, në mënyrë që të fitoni sa më shumë pikë në renditjen përfundimtare.
SHKENCAT SOCIALE
Fakulteti i Shkencave Sociale në total ka 519 kuota bosh, pasi nga 620 kuota pranimi u regjistruan vetëm 101 studentë. Lëndët formuese që vlerëson ky fakultet me nga 10% secilën janë: Histori, Qytetari, Gjuhë Shqipe dhe Letërsi, Ekonomi, dhe lëndë me zgjedhje janë: Sociologji, Psikologji dhe Filozofi. Nëse një kandidati që do të garojë në këtë fakultet i mungon njëra prej këtyre lëndëve, atëherë ai futet me minus 10% të pikëve./GSH/a.m.