Instituti Italian i Statistikave ISTAT ka publikuar sot raportin mbi numrin e emigrantëve me nënshtetësi të huaj, jo europian (ekstra komunitarë) në territorin italian deri më 1 janar 2016.
Sipas raportit të ISTAT, emigrantët me origjinë shqiptare renditen në vend të parë për numrin më të lartë të marrjes së nënshtetësisë italiane përgjatë vitit 2015.
Janë 35.134 emigrantë shqiptarë që gjatë vitit 2015 kanë marrë nënshtetësinë italiane.
Aktualisht në Itali janë 3.931.133 emigrantë ekstra komunitarë raporton Expres. Komuniteti shqiptar renditet në vend të dytë me 482.959 emigrantë të pranishëm në këtë territor. Në vend të parë renditet emigrantët me origjinë nga Maroku me 510.450 e në vend të tretë renditen 333.986 emigrantë me origjinë nga Kina.
Numri i komunitetit shqiptar në territorin italian ka pësuar një reduktim të lehtë në krahasim me një vit më parë kur numëroheshin rreth 498.419 emigrantë shqiptarë.
Një nga arsyet është fakti se çdo vit shtohet numri i shtetasve shqiptarë që fitojnë të drejtën e marrjes së nënshtetësisë italiane./a.k.
