Gjatë dy viteve të fundit numri i shqiptarëve që i bashkohen grupeve terroriste në Siri ka ardhur në rënie, madje mund të thuhet se shqetësimi që mbizotëronte gjatë vitit 2014 tashmë është zbehur. Por nëse shqiptarët, të njohur me barbaritë e ISIS apo grupeve të tjera terroriste që operojnë atje po ndërgjegjësohen dhe numri i atyre që kërkojnë t’i bashkohen është tashmë mjaft i ulët, një tjetër shqetësim në rritje shfaqet për strukturat e sigurisë. Mbi 30 shqiptarë që kanë qenë pjesë e grupeve ndërluftuese në Siri, të identifikuara si terroriste janë rikthyer në atdhe.
Një pjesë e tyre janë kthyer pasi janë plagosur, ndërsa disa janë kthyer me vullnet të lirë. Sipas të dhënave ka edhe nga ata që kanë shkuar disa herë në Siri në periudha disa-mujore dhe janë kthyer në Shqipëri. Shërbimi Informativ Shtetëror disponon një listë me të gjithë personat që janë kthyer në atdhe. Nga të dhënat e siguruara, ata persona kryejnë një jetë prej besimtari të thjeshtë, dhe i janë larguar mendësive ekstremiste. Por shqetësimi nga këta persona mbetet i lartë te strukturat ligjzbatuese.
Vigjilenca ndaj kontigjentit që vjen nga Siria
Pavarësisht se Shqipëria nuk konsiderohet si një vend potencialisht i rrezikuar nga sulmet terroriste, autoritetet e sigurisë zbatojnë disa masa sigurie pasi vendi ynë është anëtar i NATO dhe aleat i koalicionit perëndimor në luftën anti-terrorizëm.
Kontigjenti i luftëravë shqiptarë të kthyer nga Siria përbën një grupim që rikthen shqetësimin tek strukturat ligjzbatuese sa herë Evropa përballet me sulme terroriste. Ashtu si në arstin e sulmeve të Parisit, burimet nga Drejtoria Antiterror bëjnë me dije se është rritur vigjilenca për të mbajtur nën vëzhgim edhe këta persona që dikur kanë qenë pjesë e rrymës radikale islame. Mësohet se efektivët e zbulimit në të gjtiha rrethet e vendit kanë detyra për të vëzhguar dhe raportuar veprimtarinë e këtyre personave.
Çdo informacion sado i pabesueshëm vlerësohet maksmialisht nga strukturat ligjzbatuese. Pas ngjarjeve të Parisit Shqipëria zbatoi një plan masash sigurie të paprecedentë për vendin tonë duke nxjerrë në rrugë edhe patrulla me armë të rënda.
Forcat e sigurisë mësohet se kanë rritur nivelin e sigurisë edhe pas sulmeve të Brukselit. Pas shtimit të kontrolleve në aeroportin e Rinasit, edhe në pikat e tjera kufitare janë shtuar masat e sigurisë./Javanews
